Gujarati News

રાજકોટ તા. ૧રઃ મ્યુ. કોર્પોરેશન દ્વારા વ્યાજ માફી યોજના હોઇ વ્યવસાયવેરાની વસુલાત કરવા માટે સઘન રીકવરી ઝુંબેશ શરૂ કરવામાં આવેલ છે. જે અંતર્ગત વ્યવસાયવેરામાં નોંધાયેલ કુલ-પર૦૦ જેટલાં બાકીદારોને વ્યવસાયવેરો ભરપાઇ કરવા નોટીસો પાઠવવામાં આવેલ છે. જેમાં શોપધારકો, શો-રૂમ, કારખાનાં, કંપનીઓ, ભાગીદારી પેઢીઓ, બેંકો, શાળા-કોલેજો, હોસ્પીટલો, શરાફી મંડળીઓ, વિવિધ ટ્રસ્ટ, જોબવર્ક કરતી પેઢીઓ, ડોકટર, વકીલ, સી.એ., આર્કીટેકટ વિ. સહિતની કેટેગરીનો સમાવેશ થાય છે. આગામી દિવસોમાં નોંધાયેલ કરદાતાઓ પાસેથી વ્યવસાયવેરાની વસુલાત ન આવ્યેથી નિયમાનુસારની કાયદેસરની કાર્યવાહિ હાથ ધરવા માટે આયોજન કરવામાં આવેલ છે.

આ અંગે કોર્પોરેશનની સતાવાર માહિતી મુજબ વ્યવસાયવેરા વ્યાજ માફી યોજનાનો કુલ-૧પ૦૬ જેટલાં વ્યવસાયીકો/ધંધાર્થીઓ દ્વારા લાભ લીધેલ છે જેને કારણે રાજકોટ મહાનગરપાલિકાને વ્યવસાયવેરા પેટે રૂ. ૧.૬૭/- કરોડની આવક થયેલ છે તેમજ કુલ રૂ. ૧.ર૪/- કરોડનું વ્યાજ માફ કરેલ છે. ચાલું નાણાંકિય વર્ષની વ્યવસાયવેરાની કુલ આવક રૂ. ૧૦.૩પ/- કરોડ થયેલ છે.

વ્યવસાયવેરા વ્યાજ માફી યોજના પ્રથમ અને છેલ્લી વખત આવેલ છે તેમજ તા. ૩૧ ઓગસ્ટ સુધી જ અમલમાં હોવાથી રાજકોટ મહાનગરપાલિકા દ્વારા રાજકોટ મહાનગરપાલિકાની હદ વિસ્તારમાં આવેલ તમામ પેઢીઓ, વ્યવસાયીકોને ધંધા/વ્યવસાયના કાર્યક્ષેત્રના વિસ્તારમાં આવતી વોર્ડ ઓફિસનો રૂબરૂ સંપર્ક કરીને અને વ્યવસાયવેરાની આ રાહત યોજનાનો મહતમ લાભ લેવા તંત્ર દ્વારા અનુરોધ કરવામાં આવ્યો છે.