Gujarati News

રાજકોટ, તા. ૧ર : રાજકોટ ચેમ્બર ઓફ કોમર્સ એન્ડ ઇન્ડસ્ટ્રીના નવનિયુકત હોદેદારો પ્રમુખશ્રી વી.પી. વૈષ્ણવ, ઉપપ્રમુખશ્રી પાર્થ ગણાત્રા, પૂર્વ પ્રમુખશ્રી શિવલાલ બારસીયા, માનદ્ મંત્રીશ્રી નૌતમ બારસીયા, માનદ સહમંત્રીશ્રી કિશોરભાઇ રૂપાપરા, ટ્રેઝરરશ્રી ઉત્સવ દોશીએ ગુજરાત રાજયના મુખ્યમંત્રીશ્રી વિજયભાઇ રૂપાણીની ગાંધીનગર ખાતે રૂબરૂ મુલાકાત લઇ રાજકોટ-સૌરાષ્ટ્રના નીચે મુજબના વિવિધ મહત્વના પ્રશ્નો અંગે રજુઆત કરેલ.

(૧) 'વન ટેક્ષ વન નેશન'ને ધ્યાને લઇને ગુજરાત રાજયમાંથી વ્યવસાયવેરો નાબુદ કરી તેમજ આગલા વેરાની રકમ અંગે અદાલત યોજી સંપૂર્ણ વ્યાજ માફ કરી તાત્કાલીક ઘટતુ કરવા રજુઆત કરેલ.

(ર) રાજકોટ ખાતે કન્વેન્શન સેન્ટર શરૂ કરવા માટેની જગ્યા ફાળવવા ચેમ્બરે રજુઆત કરેલ હતી. તેમાં પણ મુખ્યમંત્રીશ્રીએ ટોકન દરે જગ્યા ફાળવા સહાનુભૂતિ દર્શાવી આ કન્વેન્શન સેન્ટરની મેઇન્ટેનન્સની જવાબદારી રાજકોટ ચેમ્બર ઓફ કોમર્સ દ્વારા કરવામાં આવે તેવી સલાહ આપી.

(૩) રાજકોટ ખીરસરા ખાતે ફાળવેલ જીઆઇડીસીનું ક્ષેત્રફળ વધારા માટે પુનઃવિચારણા કરવા તથા નવા એમો સ્થપાય તેને કેપીટલ ઇન્વેસ્ટમાં રાજય સરકાર દ્વારા સબસીડી આપવા તેમજ રૂ.રપ૦૦/ પર મીટર મુજબ રકમ તથા મેઇન્ટેનન્સના ટોકન ભાવથી ઉદ્યોગકારોને તાત્કાલીક ફાળવવા રજુઆત કરેલ. જેના પ્રતિસાદરૂપે રૂ.રપ૦૦/-ભાવ પણ ગુજરાત સરકારે નક્કી કરેલ છે. આમ ઉદ્યોગજગતમાં હર્ષની લાગણી ફેલાયેલ છે.

(૪) એસકપોર્ટરો માટે પરાપીપળીયા ખાતે આઇસીડીની જમીન ફાળવેલ તે હયાત માર્કેટ ભાવ કરતા પણ વધારે હોય, ઓછા ભાવથી જમીન મળે તે અંગે પુનઃ વિચારણા કરવા રજુઆત કરેલ. જેનો ભાવનો પ્રશ્ન પણ ટૂંક સમયમાં ઉકેલાય જશે.

(પ) રાજકોટના પડતર વેટ ઓડિટના પ્રશ્નો તેમજ રાજકોટ ખાતે ઘણા સમયથી ખાલી પડેલ અપિલ-ડીસીની તાત્કાલીક નિમણૂંક કરવા રજુઆત કરેલ તેમાં મુખ્યમંત્રીશ્રીએ આ અંગે તાત્કાલીક ઘટતુ કરી અપિલ-ડીસીની નિમણૂંક કરી દીધેલ છે.

રાજકોટ ચેમ્બરના પ્રતિનિધિ મંડળની રજુઆત અંગે મુખ્યમંત્રીશ્રી વિજયભાઇ રૂપાણીએ સહાનુભૂતિ દર્શાવી ચેમ્બર દ્વારા ધ્યાન પર મુકાયેલ પ્રશ્નો અંગે તુરત યોગ્ય કરવામાં આવશે તેવી ખાત્રી આપેલ છે તેમ રાજકોટ ચેમ્બરની અખબારી યાદીમાં જણાવ્યું છે.