Gujarati News

શાપર વેરાવળ તા. ૧૧: પાંચ દિવસ પહેલા શાપરના પારડી ફાટક પાસેથી એક યુવાનની ધડ માથુ નોખા થઇ ગયેલી હાલતમાં લાશ મળી હતી. તે ટ્રેન હેઠળ કપાઇ ગયાના અંદાજ સાથે શાપર પોલીસે તપાસ શરૂ કરી હતી. દરમિયા આ યુવાનની છેક આજે ઓળખ થઇ છે. તેના પરિવારજનો ગૂમ થયાની જાણ કરવા આવતાં આ યુવાન બિહારના ભાગલપુરના ગામનો વતની કૃષ્ણકુમાર સહદેવભાઇ પાસવાન (ઉ.૨૧) હોવાનું ખુલ્યું હતું.

કૃષ્ણકુમાર ચાર ભાઇ અને ચાર બહેનમાં નાનો અને કુંવારો હતો. ત્રણેક મહિના પહેલા તે શાપરના પડવલામાં રહેતી બહેન લક્ષ્મીબેન સાથે રહેવા અને મજૂરી કરવા આવ્યો હતો. તેને નશો કરવાની આદત પણ હતી. આ કારણે તેણે આપઘાત કરી લીધાનું પ્રાથમિક તપાસમાં ખુલ્યું છે. છ દિવસથી ભાઇ ઘરે ન આવ્યો હોઇ શોધખોળને અંતે આજે લક્ષ્મીબેન સહિતના પરિવારજનો શાપર પોલીસ સ્ટેશનમાં ગૂમ થયાની જાણ કરવા આવ્યા ત્યારે છ દિવસ પહેલા મળેલી ધડ માથુ નોખા થઇ ગયેલી લાશની ઓળખ થઇ હતી. બનાવથી પરિવારજનોમાં ગમગીની વ્યાપી ગઇ હતી.