Gujarati News

રાજકોટ, તા. ૧૦: જિલ્લા કલેકટર અરૂણ મહેશ બાબુએ કોરોનાની સંભવીત ત્રીજી લહેરનો સામનો કરવા માટેની જિલ્લા વહીવટી તંત્રની સજ્જતા ચકાસવા માટે સમરસ બોયઝ હોસ્ટેલ અને કેન્સર રિસર્ચ સેન્ટરની મુલાકાત લીધી હતી.

પ્રાંત અધિકારીશ્રી ચરણસિંહ ગોહિલ અને વીરેન્દ્ર દેસાઈએ કલેકટરશ્રીને કોરોનાના દર્દીઓને સારવાર માટે કાર્યરત કરાયેલા બંને સેન્ટરોની વિશેની માહિતી આપી હતી. કલેકટર સમગ્ર પરિસરની મુલાકાત લઇને નિરીક્ષણ કર્યું હતું. બંને સેન્ટરોમાં પૂરતી માત્રામાં જરૂરી તબીબી સાધનો ઉપલબ્ધ રાખવા તેમણે સંબંધિત અધિકારીઓને સૂચના આપી હતી. સમરસ હોસ્ટેલ ખાતે ટૂંક સમયમાં શરૂ કરાનારા ઓ.પી.ડી. સેન્ટર તથા તમામ બેડને પુરતો ઓકિસજન સપ્લાય આપવા, વેપરાઈઝરનું કનેકશન આપવા અને પ્રત્યેક કોરોના દર્દીના બેડ ઉપર માસ્ક અને પોર્ટેબલ બાયપેપની સુવિધા ઉપલબ્ધ કરવા પણ તેમને સૂચના આપી હતી. પ્રાંત અધિકારીના વડપણ હેઠળ ૧૦૮ નો કંટ્રોલરૂમ બંને સેન્ટર ખાતે શરૂ કરવા પણ તેમણે આદેશો આપ્યા હતા. સમરસ હોસ્ટેલ ખાતે નોડલ ઓફિસર ડોકટર મેહુલ પરમાર અને કેન્સર રિસર્ચ સેન્ટર ખાતે નોડલ ઓફિસર જિલ્લા પુરવઠા અધિકારી શ્રી પૂજા બાવડા અને ડોકટર મીના શાહે કલેકટરશ્રીને સમગ્ર બાબતથી વાકેફ કર્યા હતા. સમરસ હોસ્ટેલમાં મ્યુકર માઇકોસીસના ૪૭ દર્દીઓ છે, જે પૈકીના સાત દર્દીઓના આજે ડીસ્ચાર્જ આપવામાં આવ્યા હતા. કલેકટરે આઇસોલેશન વોર્ડની પણ મુલાકાત લીધી હતી અને મેડિકલના વિદ્યાર્થીઓ, ઇન્ટર્ની ડોકટર્સ, નર્સિંગ સ્ટાફ, હાઉસકીપિંગ સ્ટાફ વગેરેની કામગીરીની સરાહના કરી હતી. અને કોરોના કાળ દરમિયાન તેમણે કરેલી કામગીરી બદલ સન્માન પત્ર આપવા તથા સન્માન સમારંભ યોજવા પણ જણાવ્યું હતું. કલેકટરશ્રીએ કોરોનાની સંભવીત ત્રીજી લહેરનો સામનો કરવા માટે બંને સેન્ટરના નોડલ ઓફિસર તથા ડોકટરો પાસેથી જરૂરી તબીબી સાધનો તથા સ્ટાફની જરૂરિયાત અંગેની પણ માહિતી મેળવી હતી અને આ અંગે યોગ્ય કરવા જણાવ્યું હતું.

કલેકટરશ્રીની મુલાકાત સમયે પંડિત દિન દયાલ હોસ્પિટલના ડીન ડોકટર આર. એસ. ત્રિવેદી, ડોકટર જે. કે. નથવાણી, ડોકટર ઉમેદ પટેલ, ડોકટર સેજલ, હેડ નર્સ કિશોર તથા શ્રી નીતા પટેલ તથા પંડિત દીનદયાળ ઉપાધ્યાય હોસ્પિટલના અધિકારીઓ ઉપસ્થિત રહ્યા હતા.