Gujarati News

Gujarati News

News of Saturday, 9th June 2018

બિલીયાળા નજીક કાર અકસ્માતમાં રાજકોટના વ્હોરા મહિલા બાદ સસરા યુસુફભાઇનું પણ મોત

મુળ વતન વંથલીથી પરત આવતી વખતે બુધવારે ગોંડલ નજીક બનાવ બન્યો'તોઃ રણછોડનગરમાં રહેતાં વૃધ્ધે સિવિલ હોસ્પિટલમાં દમ તોડ્યોઃ બરફવાલા પરિવારમાં માતમં

રાજકોટ તા. ૯: ગોંડલના બિલીયાળા પાસે સાંજે કાર રોડ ડિવાઇડર પર ચડી જતાં ચાલક મુળ વંથલીના અને હાલ રાજકોટ રહેતાં દાઉદી વ્હોરા યુવાન, તેના પત્નિ, માતા-પિતા અને પુત્રને ઇજા થઇ હતી. જેમાં ગંભીર ઇજાગ્રસ્ત પત્નિનું ઘટના સ્થળે જ મોત નિપજ્યું હતું. સારવાર દરમિયાન આ યુવાનના પિતાનું પણ આજે મોત નિપજ્યું છે. ચાર જ દિવસમાં એક જ પરિવારના પુત્રવધૂ અને સસરાના મોત નિપજતાં માતમ છવાઇ ગયો છે.

જાણવા મળ્યા મુજબ રણછોડનગરમાં રહેતાં અને એ.સી. ફિટીંગ, રિપેરીંગનું કામ કરતાં જુજરભાઇ યુસુફભાઇ બરફવાલા (વ્હોરા) (ઉ.૩૫) મંગળવારે પોતાની કાર લઇ પોતાના મુળ વતન વંથલી ગયા હતાં. તેમની સાથે પત્નિ ફાતેમાબેન જુજરભાઇ બરફવાલા (ઉ.૩૩), માતા શાહેદાબેન (ઉ.૫૫), પિતા યુસુફભાઇ સુલ્તાનભાઇ બરફવાલા (ઉ.૬૦) અને પુત્ર મોઇઝ જુજરભાઇ (ઉ.૬) પણ ગયા હતાં.

બુધવારે સાંજે  બધા કાર મારફત પરત રાજકોટ આવવા નીકળ્યા હતાં. કાર જુજરભાઇ ચલાવી રહ્યા હતાં. બિલીયાળા નજીક પહોંચ્યા ત્યારે કોઇપણ કારણોસર જુજરભાઇએ કાબુ ગુમાવતાં કાર રોડ ડિવાઇડરમાં ચડી જતાં તમામને ઇજા થઇ હતી. જેમાં જુજરભાઇના પત્નિ ફાતેમાબેનનું ઘટના સ્થળે જ મોત નિપજ્યું હતું.

પિતા યુસુફભાઇ અને માતા શાહેદાબેનને ગંભીર ઇજા પહોંચી હતી. જ્યારે જુજરભાઇ અને પુત્ર મોઇઝનો નજીવી ઇજા સાથે બચાવ થયો હતો. યુસુફભાઇને રાજકોટ સિવિલમાં અને શાહેદાબેનને જલારામ હોસ્પિટલમાં ખસેડાયા હતાં. આજે સારવાર દરમિયાન યુસુફભાઇએ પણ દમ તોડી દીધો છે. તેઓ બે ભાઇ અને છ બહેનમાં બીજા હતાં. હોસ્પિટલ ચોકીના એએસઆઇ થોભણભાઇ ટીલારા અને દિપસિંહ ચોૈહાણે કાગળો કરી ગોંડલ તાલુકા પોલીસને જાણ કરી હતી. (૧૪.૫)

(11:49 am IST)
  • આજે ફરી તટીય મહારાષ્ટ્ર, ગોવામાં અતિ ભારે વરસાદની સંભાવના : ગઈકાલે મહારાષ્ટ્રમાં ચોમાસાનો પ્રારંભ થયા બાદ આજે રાજ્યના તટીય ભાગો, મુંબઈ અને ગોવામાં અતિ ભારે વરસાદ થવાની સંભાવના છે. તટીય કર્ણાટક, ગોવા અને દક્ષિણ મહારાષ્ટ્રમાં પહેલેથી જ વરસાદની સ્થિતિ સર્જાઈ છે. મુંબઈ અને આસપાસના વિસ્તારોમાં પ્રશાસન કોઈ પણ ઈમરજન્સીની પરિસ્થિતિને પહોંચી વળવા માટે એલર્ટ પર છે. BMC કર્માચારીઓની વીકેન્ડની રજાઓ પણ રદ કરી દેવામાં આવી છે. access_time 11:16 am IST

  • હવામાન વિભાગે આગામી ચાર-પાંચ દિવસ માટે ચેતવણી આપી છે, જે મુજબ દેશના ઘણા વિસ્તારોમાં આંધી-તોફાન અને ભારે વરસાદની આશંકા વ્યક્ત કરવામાં આવી છે. મુંબઈ, કોંકણ, કર્ણાટક, ઉત્તર પ્રદેશ, દિલ્હી, હરિયાણા, હિમાચલ પ્રદેશથી લઈને બંગાળ સુધી આંધી-તોફાન અને ભારે વરસાદની સંભાવના વ્યક્ત કરાઈ છે. આ સાથે દરિયાઈ વિસ્તારોમાં માછીમારોને દરિયો ન ખેડવા સૂચના અપાઈ છે. access_time 2:40 am IST

  • સીરિયાના બળવાખોર કબ્જાગ્રસ્ત ઇદ્લીબ પ્રાંતના એક ગામ પર રશિયાએ ફરી કર્યા ઘાતક હવાઈ હુમલાઓ : ૬ બાળકો સહિત લગભગ ૪૪ લોકોના મોત થયાનું બહાર આવ્યું : જોકે રશિયાએ આ વાતનો રદિયો આપતાં કહ્યું છે કે તેમણે આ હુમલાઓ નથી કર્યા access_time 12:37 pm IST