Gujarati News

રાજકોટઃ ચાઇલ્ડ લાઇન ૧૦૯૮ દ્વારા બે બાળકો રાજકોટ જંકશન રેલ્વે સ્ટેશને ટ્રેનમાં શંકાસ્પદ હોવાની માહિતી મળતાં જીલ્લા સમાજ સુરક્ષા કચેરી રાજકોટ અને બાળ સુરક્ષા એકમ દ્વારા આ બાળકોનું તેના વાલીઓ સાથે પુનઃસ્થાપન કરાવાયું છે. ૭મીએ રેલ્વે પોલીસ અને ચાઇલ્ડ લાઇન દ્વારા બે બાળકો માતા-પિતાથી ભાગીને ટ્રેનમાં બેસી ગયાની જાણ થતાં સમાજ સુરક્ષા અધિકારી કનકસિંહ ઝાલા, મીત્સુબેન વ્યાસ સહિતની ટીમે બાળકોનો કબ્જો સંભાળી પુછતાછ કરતાં પોતાના નામ પ્રકાશ ભગાભાઇ વાગડીયા (ઉ.૧૫-રહે. રાજસ્થાન પરવતી ગામ) તથા બીજા બાળકે પોતાનું નામ મિલન સુભાષભાઇ ચાંડેગરા (ઉ.૧૭) (રહે. હડમતીયા ગીર) હોવાનું માલુમ પડ્યું હતું. પ્રકાશચંદ્રએ પોતાના માતા-પિતા હાલ કાલાવડ રોડ પર રહી ફુગ્ગા વેંચતા હોવાનું અને પોતે માતા-પિતાએ ઠપકો આપતાં ઘર છોડી ટ્રેનમાં બેસી ગયાનું કહ્યું હતું. જ્યારે મિલને પણ પોતાના માતા-પિતા વચ્ચે ઝઘડા થતાં હોવાથી પોતે માનસિક રીતે ડિસ્ટર્બ થઇ જતાં ઘર છોડીને ટ્રેનમાં બેસી ગયાનું કહ્યું હતું. બંનેને સ્પેશિયલ હોમ ફોર બોયઝમાં રખાયા બાદ આજે વાલીઓને બોલાવી પુરતી ખાત્રી-ખરાઇ કર્યા બાદ તેને સોંપવામાં આવ્યા હતાં. (૧૪.૧૧)