Gujarati News

રાજકોટઃ રાજયના નવનિયુકત પોલીસ વડા વિકાસ સહાયે ચાર્જ સંભાળતાની સાથે જ પોલીસ કમિશ્નરેટ અને રેન્‍જની કચેરીઓનું ઇન્‍સ્‍પેકશન કરી સમીક્ષા બેઠક યોજવાનું શરૂ કર્યુ છે. આજે બપોરે શ્રી સહાય ભાવનગરથી રાજકોટ પહોંચ્‍યા ત્‍યારે સર્કીટ હાઉસ ખાતે પોલીસ કમિશ્નર રાજુ ભાર્ગવ અને રેન્‍જ આઇજી અશોકકુમાર યાદવના નેજા તળે ગાર્ડ ઓફ ઓનર આપી આદર સત્‍કાર કરવામાં આવ્‍યો હતો. આ તકે એડીશ્નલ પોલીસ કમિશ્નર શ્રી સૌરભ તોલંબીયા,  ડીસીપી પાર્થરાજસિંહ ગોહીલ, ડીસીપી સુધીર દેસાઇ, ડીસીપી પુજા યાદવ, ડીસીપી સજજનસિંહ પરમાર ઉપરાંત રેન્‍જ હેઠળના રાજકોટ જીલ્લા પોલીસ વડા સર્વશ્રી જયપાલસિંહ રાઠોડ, મોરબી પોલીસ વડા રાહુલ ત્રિપાઠી, જામનગર પોલીસ વડા પ્રેમસુખ ડેલુ સહીતના અધિકારીઓએ પુષ્‍પગુચ્‍છ અર્પણ કરી રાજયના પોલીસ વડાને શુભેચ્‍છાઓ પાઠવી હતી. પત્રકારો સાથેની ટુંકી વાતચીત દરમિયાન તેઓએ ગુન્‍હાખોરીને કાબુમાં રાખી સલામત રાજયની છાપ બરકરાર રાખવાનું લક્ષ્ય હોવાનું જણાવ્‍યું હતું. નવા પદભાર સાથે રાજયના તમામ પોલીસ કમિશ્નરેટને રેન્‍જ હેઠળના  જીલ્લાઓના અધિકારીઓ સાથે લો એન્‍ડ ઓર્ર્ડરના મુદ્દે નવેસરથી રોડ મેપ તૈયાર કરી પ્રજાના હિતમાં કામગીરી આગળ ધપાવવા પ્રયત્‍નશીલ રહેવાનું વચન તેઓએ આપ્‍યું હતું. ગુન્‍હાખોરીની બદલતી તાસીરને ધ્‍યાને રાખી સાયબર ક્રાઇમને શોધી કાઢવા રાજય પોલીસ વિભાગના અફસરોની નવી કેડર તૈયાર કરવા ઉપર પણ તેમણે ભાર આપ્‍યો હતો. (ફોટોઃ સંદીપ બગથરીયા)