Gujarati News

તસ્વીરમાં અક્ષર કલીનિક અને જેની સામે ફરિયાદ નોંધાઇ તે ડો. પ્રકાશ પરમાર નજરે પડે છે. 

રાજકોટ તા. ૮: ડોકટરને લોકો ભગવાનનું રૂપ સમજી તેના પર પુરેપુરો ભરોસો મુકતાં હોય છે. પરંતુ રૈયા ચોકડી પાસે જેએમસી નગરમાં આરએમસી કવાર્ટર પાસે કલીનિક ધરાવતાં એક હોમિયોપેથી ડોકટરને કબુધ્ધી સુજી હોય તેમ કલીનિકમાં પોતાની બે વર્ષની દિકરીની શરદીની દવા લેવા આવેલી એક પરિણીતાનો હાથ પકડી લઇ અડપલા કરી નિર્લજ્જ ચાળા કરતાં અને બિભત્સ માંગણી કરતાં આ પરિણીતા ડઘાઇ ગઇ હતી. તેણીએ રડતાં-રડતાં ઘરના સભ્યોને જાણ કરતાં બધા ડોકટરના દવાખાને પહોંચ્યા હતાં. જોતજોતામાં લોકો ભેગા થઇ જતાં ડોકટરની કરતૂત જાણી ધોલધપાટ શરૂ કરી દીધી હતી. બાદમાં તેને પોલીસને સોંપાતા પોલીસે પણ પુછતાછનો આકરો ડોઝ આપ્યો હતો.

જાણવા મળ્યા મુજબ રૈયા ચોકડી વિસ્તારમાં રહેતાં એક ૨૭ વર્ષિય પરિણીતા ગઇકાલે બપોરે પોતાની બે વર્ષની દિકરીને શરદી થઇ હોઇ જનતા ડેરીની સામેના ભાગે જેએમસી નગર પાસે આરએમસી કવાર્ટર નજીક અક્ષર કલીનિક નામે દવાખાનુ ધરાવતાં બીએચએમએસ ડોકટર પ્રકાશ બટુકભાઇ પરમાર (કડીયા) (ઉ.૩૦) પાસે દવા લેવા ગયા હતાં. ડોકટરે પરિણીતાના ખોળામાં બેસેલી તેની પુત્રીને તપાસી હતી અને એ દરમિયાન અચાનક પરિણીતાનો હાથ પકડી લીધો હતો અને ન બોલાવના શબ્દો બોલી બિભત્સ માંગણી કરતાં પરિણીતા હેબતાઇ ગઇ હતી. દવા લઇ ઘરે આવી ગયા પછી તેણી સતત ચિંતીત થઇ ગઇ હતી. બાદમાં આજે તેણી રડવા માંડતા ઘરના સભ્યોએ પુછતાછ કરતાં તેણીએ પોતાની સાથે ડોકટરે અસભ્ય વર્તન કર્યાનું કહેતાં જ સ્વજનો રોષે ભરાયા હતાં અને ડોકટરના કલીનિકે પહોંચ્યા હતાં. દેકારો થતાં આસપાસના લોકો પણ ભેગા થઇ ગયા હતાં. તબિબે છેડછાડ કર્યાની વાત સાંભળી લોકોએ પિત્તો ગુમાવ્યો હતો અને જોતજોતામાં ધોલધપાટ શરૂ કરી દીધી હતી.

દરમિયાન પોલીસને જાણ થતાં યુનિવર્સિટી પોલીસની ગાડી પહોંચી હતી અને ડોકટરને સકંજામાં લઇ ભોગ બનનાર પરિણીતાની ફરિયાદ પરથી આઇપીસી ૩૫૪ મુજબ ગુનો નોંધવાની કાર્યવાહી કરી હતી. લોકોમાં થઇ રહેલી ચર્ચા મુજબ અગાઉ પણ આવી ફરિયાદો ઉઠી હતી. યુનિવર્સિટી પોલીસ મથકના પી.આઇ. આર. એસ. ઠાકરની રાહબરીમાં પીએસઆઇ બી. જી. ડાંગર, હેડકોન્સ. મહિપાલસિંહ સહિતે જરૂરી કાર્યવાહી કરી ડોકટરની પુછતાછ કરી હતી.