Gujarati News

રાજકોટ, તા., ૭: શહેરની મધ્યમાં આવેલ દાણાપીઠમાં છેલ્લા દોઢક માસથી દોઢસોથી વધુ ટેલીફોનના ડબલાઓ બંધ થઇ ગયા બાદ કોઇ કાર્યવાહી ન થતા વેપારીઓમાં ભારે રોષ પ્રર્વતી રહયો છે.

દાણાપીઠના વેપારીઓના જણાવ્યા મુજબ દાણાપીઠ વિસ્તારમાં છેલ્લા દોઢેક માસથી દોઢસોથી વધુ ટેલીફોનના ડબલાઓ બંધ થઇ ગયા છે. સ્વામીનારાયણ શેરીમાં જ ૧૦ થી ૧પ વેપારીઓની ટેલીફોન સેવા ઠપ્પ છે. ટેલીફોનના ડબલા બંધ થઇ જતા વેપારીઓ બીએસએનએલમાં ઓનલાઇન કંમ્પલેઇન કરે છે પણ કોઇ કાર્યવાહી કરાતી નથી. એટલું જ નહિ વેપારીઓએ જયુબેલલી એકસચેન્જમાં કંમ્પલેઇન નંબરમાં ફોન કરે તો ત્યાં કોઇ ફોન રીસીવ કરતા નથી.

ટેલીફોન સેવા ઠપ્પ થઇ ગયા બાદ બીએસએનએલ દ્વારા ઓનલાઇન કે કમ્પલેઇન નંબરમાં કોઇ ફરીયાદ ન સંભળાતા વેપારીઓમાં ઉગ્ર રોષ ભભુકી રહયો છે. મોબાઇલ યુગમાં મોટા ભાગના વેપારીઓ હજુ લેન્ડલાઇન ટેલીફોન સેવાનો ઉપયોગ કરી રહયા છે. પરંતુ બીએસએનએલ દ્વારા ટેલીફોન સેવામાં સર્જાતી ખામી અંગે કોઇ કાર્યવાહી ન કરાતા વેપારીઓમાં ભારે રોષ પ્રવર્તી રહયો છે.