Gujarati News

રાજકોટ તા. ૭ : રાજકોટ શહેર - જિલ્લાની આખરી મતદાર યાદી આજે પ્રસિધ્ધ થઇ છે, જે કલેકટર કચેરી, દરેક મામલતદાર, પ્રાંત, ડે.કલેકટર, સુધરાઇ, નગરપાલિકા, ગ્રામ પંચાયત કચેરી ખાતે જોવા મળશે.

મતદાર યાદી સુધારણા કાર્યક્રમ બે મહિના ચાલ્યો, જેમાં નવા નામ ઉમેરવા, કમી, સુધારણા વિગેરે ડેટા એન્ટ્રી થયા બાદ ફાઇનલ પ્રસિધ્ધીમાં કુલ ૨૧ લાખ ૮૧ હજાર ૪૦૭ મતદારો હોવાનું જાહેર થયું છે.

જેમાં ૧૧ લાખ ૩૪ હજાર ૪૭૬ પુરૂષ અને ૧૦ લાખ ૪૬ હજાર ૯૦૦ સ્ત્રી મતદારો છે, થર્ડ જેન્ડરમાં ૩૧ મતદારો ફાઇનલ થયા છે.

સૌથી વધુ મતદારો ૬૯-રાજકોટ મુખ્યમંત્રીના વિસ્તારમાં ૩ લાખ ૩૭ હજાર ૧૧૪ અને સૌથી ઓછા મતદારો - ગોંડલ વિધાનસભા બેઠકના ૨ લાખ ૨૦ હજાર થયા છે. રાજકોટ શહેરની ૬૮-૬૯-૭૦ની ત્રણ બેઠકના ૮ લાખ ૬૫ હજાર ૫૦૦ અને જિલ્લાની રાજકોટ ગ્રામ્ય સહિત કુલ ૫ બેઠકના ૧૩ લાખ ૧૫ હજાર ૯૦૭ મતદારો હોવાનું જિલ્લા ચુંટણી અધિકારી સૂત્રોએ ઉમેર્યું હતું. આમ, શહેર - જિલ્લાના બંને થઇને કુલ ૨૧ લાખ ૮૧ હજાર ૪૦૭ મતદારો થયા છે.

સાધનોના ઉમેર્યા પ્રમાણે ૧૬-૧૨-૨૦૧૯ની સ્થિતિએ કુલ ૨૧ લાખ ૩૯ હજાર ૫૩૨ મતદારો હતા, તે સામે ૪૧૮૭૫ નવા ઉમેરાતા હવે ૨૧ લાખ ૮૧ હજારથી વધુ મતદારો થયા છે.(૨૧.૧૮)