Gujarati News

રાજકોટ તા. ૬ : રાજકોટ સહિત સૌરાષ્ટ્ર - કચ્છમાં ચારે બાજુ મેઘાએ મહેર કરતા ડેમોમાં નવા નીર છલકી ઉઠયા છે, રાજકોટ ઉપરાંત મોરબી, જામનગર, દ્વારકા, સુરેન્દ્રનગર, પોરબંદર, અમરેલી જિલ્લાના કુલ ૪૩ ડેમોમાં ૦ાા થી ૨૨ ફુટ નવા પાણી મેઘરાજાએ ઠાલવતા લોકોમાં ખુશાલીની લહેર દોડી ગઇ છે.

પોરબંદરનો સોરઠી ડેમ છલકાયો છે, તો આજી-૧માં ૨ાા ફૂટ, ન્યારી-૧માં સવા ફૂટ, ભાદરમાં ૦.૨૦ અને રાજકોટ જિલ્લાના વેણુ-૨ ડેમમાં ૧૧ ફૂટ પાણીની ધોધમાર આવક થઇ છે.

જામનગરના રૂપાવટીમાં ૧૦ ફુટ નવુ પાણી આવ્યું છે, તો દ્વારકા જિલ્લાના ખંભાળીયા નજીકના ઘી ડેમમાં સચરાચર ૭ ફૂટ નવા પાણી આવતા ખુશાલી છવાઇ હતી.

અત્રે એ નોંધનીય બનાવ એ છે કે દ્વારકાના શેઢા ભાડથરી ડેમમાં એકી સાથે ૨૨ ફૂટ નવુ પાણી આવતા કોરોધાકોડ રહેલો ડેમ જીવંત બન્યો છે, હાલ જીવંત સપાટી ૮ાા ફૂટે પહોંચી છે, ૧૫ ફૂટે આ ડેમ છલકાય છે, ૨૨ ફૂટમાંથી ૧૪ ફૂટ પાણી ડેડ વોટર તરીકે હોય તે સિંચાઇના કન્ટ્રોલ રૂમમાં નોંધાયું નથી.

અત્રે દરેક જિલ્લાના ડેમોમાં થયેલ પાણીનો વધારો આ મુજબ છે.