Gujarati News

રાજકોટ તા. ૬: સિવિલ હોસ્પિટલમાં અઠવાડીયામાં ત્રીજો મોબાઇલ ચોર પકડાયો છે. ગઇકાલે ઓપીડી નં. ૧૦ પાસે એક મહિલાનું પર્સ તફડાવતી તસ્કરણીને પકડી લેવાઇ હતી. ત્યાં આજે ફરીથી દસ નંબરની ઓપીડીમાં જ પોતાના વારા માટે લાઇનમાં ઉભેલા નિવૃત શિક્ષક અશ્વિનભાઇ ગોરધનદાસ નગવાડીયાના ખિસ્સામાંથી મોબાઇલ ફોન સેરવાઇ ગયો હતો. તેમની પાછળ ઉભેલા શખ્સે ફોન કાઢીને પોતાની સાથેની બે મહિલા કે જે દૂર ઉભી હતી તેના તરફ સરકાવતાં જ ફરજમાં રહેલા મહિલા સિકયુરીટી ગાર્ડ આ શખ્સને જોઇ જતાં દબોચી લીધો હતો. તે પકડાઇ જતાં સાથેની મહિલાઓ છનનન થઇ ગઇ હતી. પકડાયેલા શખ્સે પોતાનું નામ પ્રકાશ મનસુખભાઇ સોલંકી (દેવીપૂજક) (રહે. કોઠારીયા સોલવન્ટ પાસે) જણાવ્યું હતું. આ શખ્સને પોલીસને સોંપવામાં આવ્યો હતો. તસ્વીરમાં નિવૃત શિક્ષક, પકડાયેલો પ્રકાશ અને પોલીસ સ્ટાફ જોઇ શકાય છે.