Gujarati News

Gujarati News

News of Tuesday, 5th November 2019

દંડના ડામથી દાઝી રહેલી પ્રજા...રોષ વચ્ચે પણ સવારે ૧ાા કલાકમાં હેલ્મેટના ૮૦ કેસ

નિયમોનું પાલન કરાવવા પોલીસ કટીબધ્ધઃ ૯૪ એનસી કેસ, ૪૧૪૦૦નો દંડ વસુલાયોઃ ૧૭૮ આરટીપીના કેસ

રાજકોટ તા. ૫: ટ્રાફિકના કાયદાઓના ભંગ બદલ નવા નિયમો મુજબ આકરા દંડની વસુલાતને પગલે રાજ્યભરમાં ઠેર-ઠેર રોષ ફેલાયો છે. વડોદરામાં એક વાહન ચાલકને પોલીસે હેલ્મટે ન પહેર્યુ હોવાથી રોકતાં તેણે ભારે ધાંધલ ધમાલ મચાવી હતી અને રોડ પર સુઇ જઇ મને મારી નાંખવો હોય તો મારી નાંખો, બાકી હેલ્મેટ તો નહિ જ પહેરું તેવું કહી પોલીસ સાથે ભારે જીભાજોડી કરી હતી. આવા વિડીયો પણ ખુબ વાયરલ થયા હતાં. શહેરી વિસ્તારમાં હેલ્મેટની જરૂરિયાત નહિ હોવાની ટુવ્હીલર ચાલકોની લાગણી છે અને સોમાંથી નેવું વાહન ચાલકો શહેરમાં હેલ્મેટ પહેરવા ઇચ્છુક નથી. આમ છતાં કમરતોડ દંડ વસુલાતો હોઇ મજબૂરીવશ ટુવ્હીલર ચાલકો હેલ્મેટ પહેરતાં થયા છે. પોલીસ પણ નિયમોનું પાલન કરાવવા કટીબધ્ધ રહી છે અને આજે પાંચમા દિવસે પણ ડ્રાઇવ યથાવત રાખી હતી. સવારે દોઢ કલાકમાં હેલ્મેટના ૮૦ કેસ કરવામાં આવ્યા હતાં.

જાણવા મળ્યા મુજબ આજે સવારે એસીપી ટ્રાફિક બી.એ. ચાવડાની સુચના હેઠળ પીએસઆઇ એ. એમ. મહેતા, પીએસઆઇ વી. પી. આહિર, જે. કે. મહેતા, બી. બી. કોડીયાતર, જે. ડી. વસાવા, એન. આર. જાડેજા, એ. એલ. ઝાલા, એએસઆઇ હાર્દિકભાઇ, હેડકોન્સ. ઝાહીરખાન અબ્દુલભાઇ અને પીએસઆઇ કે. ડી. પટેલે પોલીસ હેડકવાર્ટરના ઇન ગેઇટ, આઉટ ગેઇટ, બહુમાળી ભવન ચોક, પોલીસ કમિશનરની કચેરી, આરએમસીની મુખ્ય કચેરી, ઝોનલ કચરેીઓ, રૂરલ એસપી ઓફિસ તથા કોસ્મો ચોકડી અને માધાપર ચોકડીએ ડ્રાઇવ રાખી હતી.  સવારે સાડા દસથી બપોરના બાર સુધીમાં હેલ્મેટના ૮૦ કેસ, ત્રણ સવારીના ૧૪ કેસ કરવામાં આવ્યા હતાં. ૯૪ એનસી કેસ કરી ૪૧૪૦૦નો દંડ વસુલ કરવામાં આવ્યો હતો. આ ઉપરાંત આરટીપી એપ હેઠળ વાહનોના ફોટા પાડી ૧૭૮ કેસ નોંધવામાં આવ્યા હતાં.

ઉપરોકત કામગીરી માત્ર ટ્રાફિક બ્રાંચની ટીમોની છે. અન્ય પોલીસ મથકો અને બ્રાંચ દ્વારા અલગથી હેલ્મેટના દંડની કાર્યવાહી કરવામાં આવે છે. તેમજ આઇવે પ્રોજેકટના કેમેરા દ્વારા તેમજ ઓટોમેટિક કેમેરા દ્વારા પડતા ફોટા-દંડની સંખ્યા અલગ જ છે, જે લાખોમાં થવા જાય છે.

શહેરી વિસ્તારમાં હેલ્મેટ અને સીટ બેલ્ટના કાયદા સામે વાહન ચાલકોમાં સતત અને સખત રોષ છે. પરંતુ મસમોટા દંડ ભરી શકવાની ક્ષમતા ન ધરાવતાં નાના માણસો, શ્રમિકો ડરને લીધે હેલ્મેટ પહેરવા મજબૂર થઇ રહ્યા છે. અમુક નાના મજૂરો પાસે મજૂરીના સ્થળે આવવા-જવા માટેના વાહનો તો છે પરંતુ હેલ્મેટ નથી. આવા અનેકના ફોટા પડ્યા છે. જેને આગામી સમયમાં ૫૦૦-૫૦૦ના દંડ ભરવા પડશે. લોકોના રોષ વચ્ચે પણ પોલીસ નિયમોનું પાલન કરાવવામાં કટીબધ્ધ રહી છે.

(3:24 pm IST)
  • હિરાસર એરપોર્ટ માટે ખાસ જમીન સંપાદન અધિકારી પ્રજાપતિ એવીએશનના બૂંદેલા રાજકોટમાં: કલેકટર સાથે સમીક્ષા બેઠક... એરપોર્ટની તમામ જમીન સંપાદિતઃ શકિત સિમેન્ટે પણ સહમતિ દર્શાવી... આ સામે ખેડૂત એસએસઆરડીમાં ગયા હોય.. એસએસઆરડીના હુકમ બાદ ૨૦ હજાર ચો.મી.નું વળતર ૩૦૦ લેખે ચૂકવાશેઃ ડીઆઈએલઆરના અધિકારી ધોકીયાએ પણ માપણી અંગે કલેકટરને વિગતો આપીઃ સરકારે હિરાસર એરપોર્ટ માટે જમીન સંપાદન અંગે કુલ ૯૪ કરોડ છૂટા કર્યા છે access_time 3:32 pm IST

  • એક્સ્ટ્રીમ સિવિયર કેટેગરીમાંથી હવે સિવિયર કેટેગરીમાં ફેરવાયેલ મહા વાવઝોડુ વળાંક લઈને ગુજરાત તરફ પાછું ફંટાયું : છઠ્ઠી નવેમ્બરે મોડીરાત્રે અથવા સાતમી નવેમ્બરે વહેલી સવારે દીવ અને સોમનાથ આસપાસથી 70 થી 80 કિલોમીટરની ઝડપે પસાર થશે : તે ઝડપભેર નબળું પડી રહયું છે access_time 8:39 pm IST

  • આંદામાનના દરિયામાં બુલબુલ વાવાઝોડુ સક્રિય : ૨૪ કલાકમાં સાયકલોન સ્વરૂપે ઓડીસા-પ.બંગાળ તરફ આગળ વધશે : અંદમાનના દરિયામાં વાવાઝોડુ સક્રિય વેલમાર્ક લો પ્રેશર ડિપ્રેશનમાં પરીવર્તીત : ડિપ્રેશન બની બંગાળની ખાડી તરફ આગળ વધશેઃ આગામી ૧૨ કલાકમાં ડીપ-ડીપ્રેશન બનશેઃ ૨૪ કલાકમાં : વાવાઝોડામાં પરીવર્તીત થશેઃ ઓડીશા-પ.બંગાળ તરફ ક્રોસ કરશે access_time 11:32 am IST