Gujarati News

Gujarati News

News of Thursday, 5th July 2018

'મોતની સેલ્ફી': બાઇક ટ્રકમાં ઘુસતાં બે કુટુંબી ભાઇના મોત

કુવાડવાના હીરાસર પાસે ત્રણસવારીમાં જઇ રહેલા લજાઇ, તિથવાના ત્રણ કૌટુંબીક ભાઇઓને ચાલુ બાઇકમાં સેલ્ફી લેતી વખતે અકસ્માત નડ્યોઃ લજાઇના ગૌતમ મકવાણા (ઉ.૨૪), તેના કૌટુંબીક ભાઇ વાંકાનેરના તીથવાના મુકેશ ઉભડીયા (ઉ.૨૭)ના મોતઃ લજાઇના પ્રવિણ મકવાણાને ગંભીર ઇજાઃ ચોટીલા તરફ જતી વખતે બનાવઃ વણકર પરિવારોમાં શોકની કાલીમાઃ અકસ્માત એટલો ગંભીર હતો કે ગૌતમ ટ્રકમાં ચોંટી ગયો'તો!

રાજકોટ તા. ૫: કુવાડવાથી આગળ હીરાસરના પાટીયા નજીક સાંજે ત્રણ સવારીવાળુ બાઇક ટ્રક પાછળ ઘુસી જતાં લજાઇ, તિથવાના બે વણકર યુવાનના મોત નિપજ્યા હતાં. જ્યારે એકને ગંભીર ઇજા થઇ હતી. મૃતક અને ઘાયલ થયેલા ત્રણેય યુવાનો કૌટુંબીક ભાઇ થાય છે. ચાલુ બાઇક પર આ ત્રણેય યુવાનો સેલ્ફી લઇ રહ્યા હોઇ તે વખતે ચાલકે કાબુ ગુમાવતાં અકસ્માત સર્જાયાનું પ્રાથમિક તપાસમાં ખુલ્યું છે. આ બનાવથી વણકર પરિવારોમાં કલ્પાંત સર્જાયો છે.

જાણવા મળ્યા મુજબ ટંકારાના લજાઇ ગામે રહેતો ગૌતમ દેવજીભાઇ મકવાણા (ઉ.૨૪), તેનો કૌટુંબીક ભાઇ પ્રવિણ લાલજીભાઇ મકવાણા (ઉ. ૨૨) તથા વાંકાનેરના તિથવા ગામે રહેતો ત્રીજો કૌટુંબીક ભાઇ મુકેશ લાલજીભાઇ ઉભડીયા (ઉ.૨૭) ગઇકાલે સાંજે એક બાઇકમાં ત્રણ સવારીમાં બેસી ચોટીલા તરફ જઇ રહ્યા હતાં ત્યારે હીરાસર નજીક બામણબોર તરફ આગળ જઇ રહેલા ટ્રક પાછળ ધડાકાભેર બાઇક ઘુસી જતાં ત્રણેયને ગંભીર ઇજા થઇ હતી. જેમાં એક યુવાન ટ્રક પાછળ ચોંટી ગયો હતો. બે યુવાન ગૌતમ અને મુકેશના ઘટના સ્થળે જ મોત નિપજ્યા હતાં. જ્યારે પ્રવિણને ૧૦૮ના કિશનભાઇ છાયા સહિતે રાજકોટ સારવાર માટે ખસેડ્યો હતો.

ઘટનાની જાણ થતાં કુવાડવાના પીએસઆઇ મોલીયા મેડમ, રાઇટર હેમતભાઇ તથા હમીરભાઇએ પહોંચી જરૂરી કાર્યવાહી કરી મૃતદેહોને કુવાડવા આરોગ્ય કેન્દ્ર ખાતે પોસ્ટ મોર્ટમ માટે ખસેડ્યા હતાં. પોલીસ તપાસમાં ખુલ્યા મુજબ બંને મૃતક અને ઇજાગ્રસ્ત એમ ત્રણેય કૌટુંબીક ભાઇ થાય છે. ત્રણેય યુવાન ચાલુ બાઇક પર સેલ્ફી લઇ રહ્યા હોઇ ત્યારે આ બનાવ બન્યો હતો. એક અન્ય બાઇક ચાલકે આ દ્રશ્ય નજરે જોયું હોઇ તેણે પોલીસને જાણ કરી હતી કે સેલ્ફી લેતી વખતે અકસ્માત સર્જાયો હતો.

અકસ્માત એટલો ગંભીર હતો કે બાઇક પર સવાર ગૌતમ ટ્રક પાછળ ચોંટી ગયો હતો. જોરદાર અવાજ થતાં ટ્રક ચાલક પણ ગભરાઇ ગયો હતો અને ટ્રક ઉભો રાખી દીધો હતો. બનાવને પગલે પરિવારોમાં કલ્પાંત સર્જાયો છે. (૧૪.૯)

(4:56 pm IST)
  • રાહુલ ૧૬-૧૭ બે 'દિ ગુજરાતના પ્રવાસે : ધારાસભ્યો સાથે બેઠક કરશે : રાજકોટ પણ આવે તેવી પુરેપુરી શકયતા access_time 11:28 am IST

  • પેટ્રોલ-ડીઝલમાં ફરીવાર ભાવ વધારો શરુ :કાલે ગુરુવારે પેટ્રોલમાં લિટરે 16 પૈસા અને ડીઝલમાં 13 પૈસાનો ભાવ વધારો ;ભાવ વધારો સવારે છ વાગ્યાથી લાગુ થશે ;આંતર રાષ્ટ્રીય બજારમાં ક્રૂડના ભાવમાં નવેસરથી આવેલ તેજીના પગલે ઇંધણના ભાવમાં ભડકો થશે access_time 10:35 pm IST

  • યુ ટર્ન :ખાડીની ટોચની એરલાઇન્સ કંપની એમિરેટ્સે પોતાની ફ્લાઈટમાં 'હિન્દૂ ભોંજન 'નો વિકલ્પ સમાપ્ત કરવાનો નિર્ણય રદ્દ કરી દીધો :કંપનીએ કહ્યું કે તેને આ પગલું ગ્રાહકોના મંતવ્યના આધારે ઉઠાવ્યું છે ;આ પહેલા કંપનીએ પોતાના વિમાનમાં હિન્દૂ ભોજનનો વિકલ્પ સમાપ્ત કરવાની જાહેરાત કરી હતી access_time 1:05 am IST