Gujarati News

રાજકોટ તા. પઃ અંગત મિત્ર પાસેથી હાથ ઉછીના ૧૪ લાખ લઇને પૈસા પરત કરવાની ચુકવણી પેટે આપેલા ચેક રિટર્ન થતાં જે.એમ.એફ.સી. કોર્ટમાં ફોજદારી ફરિયાદ દાખલ કરવામાં આવેલ છે.

આ કેસની વિગત જોઇએ મહિપાલસિંહ હેમંતસિંહ જાડેજા રહે. રોજીયા એ તેમના અંગત મિતર એવા જાડેજા મયૂરસિંહ ચંદ્રસિંહ મુ. સરધાર તાલુકો, જિલ્લો રાજકોટ વાળાને પૈસાની જરૂર હોય મિત્રતાના દાવે, સબંધના નાતે ચૌદ લાખ રૂપિયાની મદદ કરેલ, આ કામના આરોપી મયૂરસિંહ એ ફરિયાદી મહિપાલસિંહ પાસેથી આ પૈસા તેમના ધંધાના વિકાસ માટે તારીખ રર-પ-ર૦૧૯ના રોજ ૧ર માસનું કહીને લીધેલા. ફરિયાદીએ આ રકમ મિત્ર હોવાના કારણે ને હાથ ઉછીના વગર વ્યાજે આપેલ. જેની આ કામના આરોપી મયૂરસિંહ એ ફરીયાદીને નોટરી સાહેબ સમક્ષ પાકી પહોંચ અને પ્રોમિસરી નોટ બનાવી આપેલ હતી.

અને આ રકમની સલામતી પેટે આ કામના આરોપીએ ફરીયાદીને આઇ.સી.આઇ.સી.આઇ. બેંક, યાજ્ઞિક શાખાના ત્રણ ચેક લખી આપી સહીઓ કરાવી આપેલ. પૈસા પરત કરવાનો સમય થતાં મૌખિક રીતે ફરીયાદી એ આ મયૂરસિંહને જણાવતા મયૂરસિંહએ ફરિયાદીને ઉપરોકત ત્રણેય ચેકો ફરિયાદીને તારીખ ર૩-૯-ર૦ર૦ના પછી ગમે ત્યારે રોજ ચેકો વટાવી લેવાનું જણાવેલ અને આ ચેક નાખશે એટલે ફરિયાદીના પૈસા પરત મળી જશે તેવું પાકું વચન વિશ્વાસ આપેલ. જેથી મયૂરસિંહની આ વાત ઉપર ભરોસો રાખીને ફરિયાદીએ ઉપરોકત ત્રણેય ચેક ફરિયાદીએ પોતાની બેન્કમાં તારીખ ૩/૧૦/ર૦ર૦માં નાખતા તારીખ પ/૧૯/ર૦ર૦ના રોજ અપુરતા ફંડના શેરા સાથે વણવટાવ્યો પરત ફરેલ હતાં.

ઉપરોકત ચેક પરત ફરતા આ કામના તહોમતદારને ફરીયાદીએ વકીલ કુલદીપસિંહ જાડેજા મારફતે તા. ૪/૧૧/ર૦ર૦ ના રોજ રજી. એડી.થી આરોપીના નિયત સરનામે તથા જે તે સમયે આરોપી અન્ય એક ગુનામાં ગોંડલ સેન્ટ્રલ જેલમાં હોય. જેલમાં નોટિસ મોકલાવેલ જે આરોપીને તારીખ ૭-૧૧-ર૦ર૦ના રોજ બજી ગયેલ હોય, આ નોટિસના સામે આરોપી એ પોતાના વકીલ મારફત તદ્દન ઉડાવ જવાબ આપતી નોટિસનો પ્રત્યુતર આપેલ તેમજ ૧પ દિવસનો સમય વીતવા છતાં મયૂરસિંહ એ ચેકની રકમ વસૂલ આપેલ નહીં જેથી આરોપીની પૈસાના દેવાની દાનત છતી થતાં મહિપાલસિંહ એ ત્રણ અલગ અલગ ચેક પરત ફરતા ૧૪ લાખની ચેક રિટર્નની ફોજદારી ફરિયાદ દાખલ કરવામાં આવેલ છે.

આ કેસમાં રાજકોટના વકીલ કુલદીપસિંહ બી. જાડેજા, શિવરાજસિંહ ઝાલા, જયરાજસિંહ જાડેજા તથા અશોક ચાન્ડપા રોકાયેલ છે.