Gujarati News

. કોરોનાનું સંક્રમણ અટકાવવા લોકોએ બહાર નીકળતી વખતે ફરજીયાત અમુક નિયમોનું પાલન કરવાનું છે. માસ્ક પહેરવું પણ ફરજીયાત છે. અગાઉ ટુવ્હીલરમાં એક સવારીની જ છુટ હતી. પરંતુ અનલોકમાં ડબલ સવારીની છુટ અપાઇ છે. નિયમોનું પાલન કરવું ફરજીયાત હોવા છતાં અમુક લોકો સમજતાં નથી. લીમડા ચોકમાં આવા જ કારણોસર એક શખ્સે ટ્રાફિક પોલીસ સાથે માથાકુટ કરી હતી. આ શખ્સ નંબર વગરના ટુવ્હીલરમા બીજા એક શખ્સને બેસાડીને નીકળ્યો હતો. માસ્ક પણ પહેર્યુ નહોતું. ટ્રાફિક પોલીસે તેને અટકાવી નિયમો સમજાવતાં અને દંડની વાત કરતાં આ શખ્સ રોષે ભરાઇ ગયો હતો અને ઉશ્કેરાઇ જઇ ન બોલવાના શબ્દો બોલી ગયો હતો. એ પછી તેણે પોતાના મોબાઇલ ફોનથી ટ્રાફિક પોલીસનો વિડીયો ઉતારવાનું પણ શરૂ કર્યુ હતું. તેની હવા વધી જતાં નાછુટકે કન્ટ્રોલ રૂમમાં જાણ કરવામાં આવતાં ગાડી આવી હતી અને આ શખ્સને તેમાં બેસાડી પોલીસ મથકે લઇ જવાયો હતો. પરંતુ અહિ પહોંચતા જ તે જાણે કાયદો સમજી ગયો હોય તેમ ઢીલોઢફ થઇ ગયો હતો અને માફામાફી કરવા માંડ્યો હતો. પોલીસમેને પણ માનવતા દાખવી તેને માફ કરી દીધો હતો. (ફોટોઃ સંદિપ બગથરીયા)