Gujarati News

રાજકોટ તા. ૪ :.. રાજકોટ કલેકટર તંત્રે પોતાની કચેરીએ ટોળા આવતા અટકાવવા  ઓનલાઇન પાસનું ગતકડૂ વહેતુ મૂકી દિધુ અને તેના કારણે રાજકોટની આમ જનતા ભારે મુશ્કેલીમાં મૂકાઇ ગઇ છે.

લોકો પ્રચંડ આક્રોશ સાથે બોલી રહ્યા છે કે, ઓનલાઇન પાસ વ્યવસ્થા બંધ કરો ૮૦ ટકાની અરજી રીકવેસ્ટ રીજેકટ થાય છે, શું કલેકટર તંત્ર બધાને ખોટા જ સમજે છે.

કલેકટર-એડી. કલેકટરે ઓનલાઇન પાસની અરજી ચકાસવા બે ડઝન ટીમો બેસાડી, પણ આ ટીમમાંથી અનેક એવા કર્મચારીઓ છે કે જે નાના - નાના સવાલો ઉભા કરી રહ્યા છે, અને અરજીઓ ફગાવી દેતા હોય છે.

અધુરામાં પુરૂ પલ્મ્બર-મજૂરો-મીસ્ત્રી- કડીયા કામ કરતા માણસો - ઇલેકટ્રીશયન વિગેરેમાંથી ૯૦ ટકાને અરજીઓ કરતા આવડતી નથી. આ લોકોનો શું વાંક, તો નાના એવા ઘણા વેપારીઓ ભારે રોષ સાથે કહી રહ્યા છે કે, કારખાનેદારો-બીલ્ડરોને ઓન લાઇનમાંથી બાકાત રાખ્યા, એક બાંહેધરી પત્રક આપો અને ધડાધડ પાસ અપાયા, કલેકટર તંત્રે આવા કારખાનેદારો-બીલ્ડરોને   ૧૭ હજાર જેટલા પાસ આપી દિધા છે, અમારા નાના વેપારીઓનો શું વાંક - રાજકોટ ચેમ્બર ઓફ કોમર્સ કંઇક કરે તેવી માગણીઓ ઉઠી છે.

એટલુ જ નહી રાજકોટમાં અનેકલોકો પોતાના સગાના ઘરે ફસાઇ ગયા છે, તેમને પોતાના જીલ્લામાં જવા માટે ઓનલાઇન અરજી કરવાની, આવી અરજીઓ થઇ પણ માંડ ૪ થી પ ટકા મંજૂર થઇ, તંત્ર એવુ કહે છે... પુરતા પુરાવા નહોતાં... હવે આમાં આ લોકો બીજા પુરાવા કયાંથી કાઢે તેવો સવાલ ઉઠયો છે.

લોકો કહે છે, રાજકોટમાં ઓનલાઇન પાસની પ્રથા છે, બીજા જીલ્લામાં તો કયાંય નથી, એક તરફથી પાસ મળતો નથી, ઉપરથી પોલીસ બળ પ્રયોગ કરી રહી છે, પ્રજાની નીરાશા ચરમસીમાએ છે.