Gujarati News

Gujarati News

News of Tuesday, 3rd December 2019

ઘંટેશ્વર મહાદેવ પાર્કની બાળાને ડેંગ્યુ ભરખી ગયો

૧૬ વર્ષની ક્રિષ્નાના મોતથી ઘંટેશ્વર ગ્રીન લીફ પાછળ રહેતાં મોચી પરિવારમાં કલ્પાંતઃ પરિવારજનોએ આક્ષેપ કર્યો-પદ્દમકુંવરબા હોસ્પિટલમાં તબિબે ઇન્જેકશન આપ્યા બાદ હાથ કાળો પડી ગયો અને મોત થયું: મોતનું સાચુ કારણ જાણવા ફોરેન્સિક પોસ્ટમોર્ટમ

રાજકોટ તા. ૩: રોગચાળામાં વધુ એકનો ભોગ લેવાયો છે. જામનગર રોડ પર ઘંટેશ્વર ગ્રીનલીફ પાછળ મહાદેવ પાર્કમાં રહેતાં મોચી પરિવારની ૧૬ વર્ષની દિકરીને ડેંગ્યુ થયા બાદ મોત નિપજતાં સ્વજનોમાં કલ્પાંત સર્જાયો છે. પદ્દમકુંવરબા હોસ્પિટલમાં આ બાળાને દાખલ કરવામાં આવી હતી. જેને ડેંગ્યુ હોવાનો રિપોર્ટ પોઝિટીવ જાહેર થયો હતો. જો કે બાળાને ઇન્જેકશન અપાયા બાદ તેની હાલત બગડી હતી અને એ કારણે મોત થયાનો આક્ષેપ સ્વજનોએ કરતાં મોતનું ચોક્કસ કારણ જાણવા પોલીસે મૃતદેહનું ફોરેન્સિક પોસ્ટ મોર્ટમ કરાવ્યું છે.

જાણવા મળ્યા મુજબ ઘંટેશ્વર મહાદેવ પાર્ક-૧માં રહેતાં મનિષભાઇ સરવૈયા (મોચી)ની દિકરી ક્રિષ્ના (ઉ.વ.૧૬)ને કેટલાક દિવસથી તાવ આવતો હોઇ ગઇકાલે તેણીને ગુંદાવાડી પદ્દમકુંવરબા હોસ્પિટલમાં બપોરે બે વાગ્યા આસપાસ દાખલ કરવામાં આવી હતી. ડેંગ્યુ હોવાની શંકાએ રિપોર્ટ કરાવવામાં આવ્યા હતાં. જેનો સાંજે પોઝિટીવ રિપોર્ટ આવ્યો હતો. જો કે સારવાર દરમિયાન સાંજે સવા પાંચેક વાગ્યે ક્રિષ્નાનું મોત નિપજતાં પરિવારમાં કલ્પાંત સર્જાયો હતો.

હોસ્પિટલથી તબિબે યુનિવર્સિટી પોલીસને જાણ કરતાં હેડકોન્સ. ભગીરથસિંહ બી. ખેરએ એડી નોંધી જરૂરી કાર્યવાહી કરી મૃતદેહને પોસ્ટ મોર્ટમ માટે ખસેડ્યો હતો. ક્રિષ્નાના પરિવારજનોએ એવો આક્ષેપ કર્યો હતો કે ક્રિષ્નાને દાખલ કરવામાં આવ્યા બાદ ડોકટરે તેને ઇન્જેકશન આપ્યું હતું. એ પછી તેનો હાથ કાળો પડી ગયો હતો અને સારવાર દરમિયાન મોત નિપજ્યું હતું. સારવારમાં બેદરકારીને કારણ દિકરીનું મોત થયાનો આક્ષેપ થતાં પોલીસે ફોરેન્સિક પોસ્ટ મોર્ટમ કરાવ્યું છે.

મૃત્યુ પામનાર ક્રિષ્ના બાઇસાહેબબા સ્કૂલમાં ધોરણ-૧૦માં ભણતી હતી. તે બે બહેન અને એક ભાઇમાં મોટી હતી. તેના પિતા છુટક ફેરી કરે છે. લાડકવાયી દિકરીના મોતથી પરિવારમાં ગમગીની છવાઇ ગઇ હતી. ફોરેન્સિક રિપોર્ટ આવ્યા બાદ પોલીસ આગળ કાર્યવાહી કરશે. જો કે હોસ્પિટલના કેસ કાગળોમાં જે નોંધ છે તેમાં ડેંગ્યુ પોઝિટીવ હોવાનો ઉલ્લેખ છે. અગાઉ પણ શહેરમાં ડેંગ્યુથી ભોગ લેવાયા છે, ત્યારે વધુ એક ઘટનામાં એક બાળા ભોગ બની છે.

(3:32 pm IST)
  • માનવ સંસાધન મંત્રાલય કહ્યું છે કે તુરતમાં નવી શિક્ષણ નીતિ જાહેર કરી દેવાશે access_time 12:50 am IST

  • વિજયભાઈ રૂપાણીના ભત્રીજા અને ભત્રીજા વહુને બગોદરા પાસે અકસ્માત : બંને હેમખેમ : ઝાયડ્સ હોસ્પિટલમાં એક દિવસ દેખરેખ હેઠળ રાખેલ છે : આજે બપોરે મુખ્યમંત્રી શ્રી વિજયભાઈ રૂપાણીના સગા ભત્રીજા શ્રી અમિનેષ રૂપાણી અને તેમના પત્નિ શ્રીમતી વિમી રૂપાણીને બગોદરા પાસે અકસ્માત નડ્યો હતો. સામેની સાઇડેથી ગમે તે કારણોસર કોઈ મોટર અમિનેષના મોટરની દિશામાં આવી ટકરાતા અમિનેષને અને તેના પત્નિ બંનેને તાત્કાલીક અમદાવાદ સાવચેતીરૂપે લઈ જવામાં આવેલ. ઝાયડ્સ હોસ્પિટલમાં સીટી સ્કેન અને બધી જ તપાસ કરતા સંપૂર્ણ નોર્મલ અને ભયમુકત હોવાનું જાણવા મળે છે, આમ છતા તેમને એક દિવસ ઓબ્ઝર્વેશનમાં રાખવામાં આવ્યા છે. અમિનેષ અને વિમીબેનની તબિયત સારી છે. બંને ભયમુકત છે. access_time 3:56 pm IST

  • જીડીપીના આંકડા મામલે ભાજપના સાંસદ નિશાકાન્ત દુબેએ કહ્યું જીડીપી કોઈ બાઇબલ કે રામાયણ નથી : થોડા વર્ષોમાં જીડીપીની જરૂરિયાત નહિ રહે : નિશાકાન્ત ડૂબેએ જીડીપીની થિયરી પર સવાલ ઉઠાવ્યા : તેઓએ કહ્યું જીડીપીને બદલે સતત આર્થિક વિકાસનું મહત્વ છે access_time 1:17 am IST