Gujarati News

રાજકોટ, તા. ર : રાજકોટ કલેકટરશ્રી રેમ્યા મોહને આજે પત્રકારો સાથેની વાતચીતમાં જણાવ્યું હતું કે, શહેરની અંદર અને શહેર બહાર સરકારી જમીનો સર્વે કરી કુલ કેટલા દબાણો છે તેની માહિતી આપવા આદેશો કરાયા છે. ખાસ કરીને રાજકોટ તાલુકામા તાલુકા મામલતદાર દ્વારા કોઠારીયા-માધાપર-ઘંટેશ્વર-વાવડી-ખોખડદડ, ગવરીદડમાં કુલ ૮૯ હજાર ચો.મી. જમીન કે જેની કિંમત હાલ ૧૦૦ કરોડ ૭ર લાખથી વધુ થવા જાય છે. તે જમીનો ઉપરના કુલ ૬૮ દબાણો ઉભા થઇ ગયા હતાં. તે દૂર કરાયા છે. આવી જ રીતે દક્ષિણ મામલતદાર દ્વારા મવડી સર્વે નં.૧૯૪ની પ૯૦૦ ચો.મી. જમીન ઉપર ૧પ દબાણકારોએ પ કરોડની સરકારી જમીન ઉપર દબાણ કર્યું હતું તે દૂર કરાયું છે.

કલેકટરે ઉમેર્યું હતું કે, નવાગામને રાજકોટમાં ભેળવી દેવાયું છે, હવે ત્યાંની સરકારી જમીનો ઉપર દબાણનો સર્વે કરવા ટીડીઓ-પ્રાંતને કહેવાયું છે.

આ ઉપરાંત દબાણો ખૂલ્લુ કરાયેલ જમીન ઉપરાંત આસપાસના વિસ્તારમાં કેટલી સરકારી જમીન છે તે જાણી અને તેની બોર્ડર નક્કી કરી દરેક સ્થળે ખાસ સરકારી જમીનના બોર્ડ મૂકવા પણ સૂચના અપાઇ છે. આવી સૂચના સમગ્ર જીલ્લાના મામલતદારો-ડે. કલેકટરોને અપાયાનું કલેકટરે ઉમેર્યું હતું.

તાલુકા મામલતદારે છ માસમાં ૧૦૦ કરોડના દબાણો દૂર કર્યા