Gujarati News

ન્યુજર્સી : યુ.એસ.માં ફેડરેશન ઓફ ઇન્ડિયન એશોશિએશન ( FIA ) ન્યુયોર્ક ,ન્યુજર્સી ,એન્ડ કનેક્ટિકટના નવનિયુક્ત ચેરમેન તરીકે યુવા બોર્ડ મેમ્બર શ્રી અંકુર વૈદ્યની પસંદગી કરાઈ છે.સૌથી મોટી અને જૂની એવી પાયાની છત્ર સંસ્થાએ કોવિડ-19 મહામારી બાદ અને બોર્ડના અધ્યક્ષ રમેશ પટેલના દુઃખદ અવસાન બાદ, સ્પોટ્સવુડ ન્યુજર્સી સ્થિત કચેરીએ પ્રથમ આંતરિક બેઠક યોજી હતી. આ બેઠક એફઆઈએ પ્રમુખ અનિલ બંસલ દ્વારા ટ્રસ્ટી મંડળની બહુમતિથી બોલાવવામાં આવી હતી. સ્વતંત્ર સલાહકારોની દેખરેખ હેઠળ બેઠક મળી હતી. એફઆઈએ ટ્રાય સ્ટેટના નવા અધ્યક્ષ તરીકે યુવા ચહેરા અંકુર વૈદ્યની નિયુક્તિ કરવામાં આવી છે. બોર્ડમાં સૌથી નાના સભ્ય તરીકે વૈદ્યની પસંદગી કરાઈ છે. વૈદ્ય સંસ્થામાં અવિરત આંતર-સંગઠનાત્મક અનુભવ અને સમુદાય કુશળતા લાવ્યા છે, જેણે છેલ્લા એક દાયકામાં સંસ્થાને અભૂતપૂર્વ લક્ષ્યો સુધી પહોંચાડવામાં મદદ કરી છે. કોન્સ્યુલર સેવા સહાયતા, સમુદાય સહાય, રેડ ક્રોસ ભાગીદારી, કોર્પોરેટ સેન્સરશિપ અને સંસ્થાઓની નાણાકીય પ્રગતિ આ તમામ બાબતો વૈદ્યના સહયોગથી સંભવ થઈ શકી છે.
લાંબા સમયથી એફઆઈએના દિગજ્જ નેતા પદ્મશ્રી ડો. સુધીર એસ. પરીખ અને પદ્મશ્રી એચ. આર. શાહની વરિષ્ઠ સલાહકાર તરીકે પસંદગી કરવામાં આવી હતી. તેઓ બોર્ડના નવા યુવા અધ્યક્ષની દેખરેખ તેમજ સલાહ આપવાની ભૂમિકા આદ કરશે.
વૈદ્ય ઉપરાંત બોર્ડમાં બિપિન પટેલને વાઈસ ચેરમેન તેમજ જયેશ પટેલ મહામંત્રી તરીકે જોડાયા છે. વર્તમાન બોર્ડમાં રામભાઈ ગઢવી, ચંદ્રકાંત ત્રિવેદી, પ્રબીર રોય, ડો. પ્રવીન પાંધી, એન્ડી ભાટીયા, શ્રીજલ પરીખ, આનંદ પટેલ, દિપક પટેલ અને કનુભાઈ ચૌહાણ સહિતના સમુદાયના અગ્રણીઓ પણ સામેલ છે. રોયલ આલ્બર્ટ્સ પેલેસના આલ્બર્ટ જસાણી એફઆઈએના ગોલ્ડન જ્યુબિલી વર્ષ માટે એમિરટસ વાઈસ ચેરમેન તરીકે યશ પૌલ સોઈની સાથે જૂથના યુનિફાઈંગ- યુનિટી ટ્રસ્ટી તરીકે પસંદ થયા હોવાનું એક યાદીમાં જણાવ્યું હતું.
ઉલ્લેખનીય છે કે એફઆઈએ દ્વારા દર વર્ષે અમેરિકામાં ભારતના સ્વતંત્રતા દિન એટલે કે 15મી ઓગસ્ટના રોજ તેના પ્રમુખ કાર્યક્રમ સ્વતંત્રતા દિવસ પરેડનું આયોજન કરે છે. મેનહટન ખાતે યોજાતી આ વિશાળ ઈન્ડિપેન્ડેન્સ ડે પરેડમાં અમેરિકાના અગ્રણી રાજકીય નેતાઓ, સાંસદો ઉપરાંત ભારતીય-અમેરિકન સમુદાયના દિગ્ગજ લોકો, ખ્યાતનામ લોકો તેમજ હજારોની સંખ્યામાં ભારતીયો પણ આ પરેડમાં ઉપસ્થિત રહે છે.