Gujarati News

Gujarati News

News of Monday, 29th June 2020

રાજકોટના પૂર્વી બુટોલાએ હોંગકોંગમાં કમાલ કરી

ભારતીય નૃત્યકલા-કુકિંગકલા સહિતની પરંપરાને ધબકતી કરી : રાજકોટના રઘુવંશી પરિવારના પૂર્વીબેન લગ્ન બાદ હોંગકોંગ સ્થાયી થયાઃ અજાણ્યા દેશમાં ભારતીય કલાના સંગાથે છવાઈ ગયા

રાજકોટ, તા. ૨૯ :. રાજકોટના શિક્ષિકા ચંદ્રિકાબેન ઠક્કરના પુત્રી પૂર્વીબેને હોંગકોંગમાં કમાલ કરી છે. પૂર્વીબેન બાળપળથી જ નૃત્ય સહિતની વિવિધ કલાઓમાં રસ ધરાવતા હતા.

મૂળ દેહરાદૂનના સંદીપ બુટોલા સાથે લગ્ન થયા બાદ સંદીપભાઈની ટ્રાન્સફર હોંગકોંગ થઈ હતી. પૂર્વીબેનને હોંગકોંગમાં સ્થાયી થવાનું આવ્યું. અજાણ્યા દેશમાં શું થશે ?  તેવો વિચાર અકળાવતો હતો. જો કે વિવિધ કલાના માહેર પૂર્વીબેન હોંગકોંગમાં છવાઈ ગયા છે.

'અકિલા'ની મુલાકાતે આવેલા પૂર્વી બુટોલા કહે છે કે, મને હંમેશા સર્જનાત્મક કળાઓ અને ખાસ કરીને નૃત્ય દ્વારા આકર્ષિત કરવામાં આવી હતી જે પછીથી મારો શોખ અને જુસ્સો બની ગયો.

પરિવારનો ટેકો અને હંમેશા મારી મમ્મીની પ્રેરણાદાયક સલાહથી મારે જે કરવાનું છે તે અનુસરવાની હિંમત અને આત્મવિશ્વાસ મળ્યો. સમય સાથે પછી હું ઉમદા ડાન્સર, કોરિયોગ્રાફર અને ડિઝાઈનર તરીકે બહાર આવી. મને હજુ પણ ૩ વર્ષની નાની ઉંમરે મારૂ પહેલુ નૃત્ય પ્રદર્શન યાદ છે, જેની ખૂબ પ્રસંશા થઈ હતી.

નૃત્યના કારણે હું હંમેશા જીવનના દરેક પાસાઓમાં શ્રેષ્ઠ બનવાનુ શીખી શકી હતી. મારી શાળાના દિવસોમાં મારી પાસે પહેલાથી ઘણા વિદ્યાર્થીઓ હતા જે મારી પાસેથી નૃત્ય શીખતા હતા. એણે મને એટલુ પ્રોત્સાહન આપ્યુ કે પછી હું સ્નાતક થયા પછી મારા પોતાના નૃત્ય વર્ગો હતા જ્યાં હું લોક, શાસ્ત્રીય, પરંપરાગત અને બોલીવુડ માટે નૃત્યના વર્ગો આપુ છું.

શ્રીમતી બુટોલા કહે છે કે, વર્ષ ૨૦૧૫મા જ્યારે હું હોંગકોંગ ગઈ ત્યારે હું નવા દેશમાં અને અજાણ્યા લોકોની વચ્ચે હોવાના કારણે થોડી તણાવપૂર્ણ હતી પરંતુ હોંગકોંગમા મને એક મહિનો પણ નહોતો થયો જ્યારે મને મારો પહેલો ડાન્સ પ્રોજેકટ એક જાણીતી એનજીઓ 'લેડી મેકલેહોઝ સેન્ટર' તરફથી મળ્યો

શરૂઆતમાં મેં કોઈપણ આંતરરાષ્ટ્રીય નૃત્ય ફોર્મ પર પ્રદર્શન કરવાનુ વિચાર્યુ પણ પછી મારી સંસ્કૃતિને પ્રોત્સાહન આપવા ભારતીય પરંપરાગત સ્વરૂપ પર નૃત્ય કરવાનો વિચાર આવ્યો.

મારા આશ્ચર્યની વાત એ છે કે પ્રદર્શનના અંત આખા પ્રેક્ષકોએ મારા અભિનયને બિરદાવ્યો અને મને શુભેચ્છાઓ આપી. ઘણા લોકો મારી સાથે ભારતીય નૃત્ય સ્વરૂપો અને અમારી સંસ્કૃતિ વિશે પ્રશ્નો પૂછવા માટે વાતચીત કરવા આગળ આવ્યા હતા. આ મારા માટે એક અદભૂત અનુભવ હતો અને તેણે મને સ્થાનિક લોકો સાથે ભળવાની તક પણ આપી.  મારા પ્રથમ પ્રદર્શન પછી અન્ય ઘણી સંસ્થાઓએ મારો સંપર્ક કર્યો અને પછીથી હું વધુને વધુ પ્રદર્શન કરવા લાગી. ધીમે ધીમે મેં આપણી ભારતીય સંસ્કૃતિને સંપૂર્ણ રીતે ત્યાં ફેલાવવાનો નિર્ણય કર્યો અને રસોઈ, મહેંદી, આર્ટ એન્ડ ક્રાફટ અને અન્ય ઘણી આંતર સાંસ્કૃતિ વર્કશોપ કરવાનું શરૂ કર્યુ.

આજે હું હોંગકોંગથી મોટાભાગની નામાંકીત એનજીઓ સાથે સંકળાયેલી છું.

પૂર્વી બુટોલા નૃત્ય પ્રવૃતિ ઉપરાંત કુકિંગ વર્કશોપ, સાંસ્કૃતિક વિનિયમ-આર્ટ વર્કશોપ, હેન્ડમેડ ગારમેન્ટ-જ્વેલરી પ્રદર્શન વગેરે પ્રવૃતિ પણ કરે છે.

પૂર્વીબેન કહે છે કે, હોંગકોંગમાં ૩૦ ટકા વસ્તી ભારતીયોની છે, ત્યાં કલાની કદર થાય છે અને તેજસ્વિતાને ભરપૂર તક પ્રાપ્ત થાય છે. ચાઈનીસ લોકો ભારતીય ફૂડ શીખવા આવે છે. પૂર્વીબેન ભવિષ્યમાં ભારતીય હેન્ડમેડ વસ્તુઓનો શો-રૂમ કરવાનું આયોજન પણ ધરાવે છે.

(3:59 pm IST)
  • મહારાષ્ટ્રની સરકારી ઓફીસોમાં મરાઠી ભાષા ફરજીયાત બનાવાઇ : કર્મચારીઓને કામકાજમાં મરાઠી ભાષાનો ઉપયોગ કરવો પડશેઃ આદેશનું પાલન ન કરનાર સામે ઇન્ક્રીમેન્ટ પર લાગશે રોકઃ ઓફીસોમાં પત્ર વ્યવહાર માટે પણ મરાઠી ભાષાનો જ ઉપયોગ કરવા આદેશ access_time 2:49 pm IST

  • કોરોના પ્રતિકાર માટે મેં દવા શોધી કોઈ ગુનો કર્યો ? : મારા વિરુદ્ધ એફ.આઇ.આર દાખલ કરવામાં આવી : મારો સત્કાર ન કરી શકો તો કાંઈ નહીં તિરસ્કાર તો ન કરો : શું કોટ અને ટાઇ પહેરવાવાળા જ સંશોધન કરી શકે છે ધોતિયાવાળા નહીં ? : બાબા રામદેવે પત્રકાર પરિષદમાં આક્રોશ ઠાલવ્યો access_time 2:35 pm IST

  • લડાખ બોર્ડર ઉપર ભારતીય સેના સજ્જ : દેશના રક્ષામંત્રી રાજનારાયણ સિંહ તથા આર્મી ચીફ જનરલ મુકુંદ નરવણે શુક્રવારે સ્થળ ઉપર જશે : પરિસ્થિતિની સમીક્ષા કરશે : જવાનોનો જુસ્સો વધારશે access_time 6:56 pm IST