ચીનમાં મુશળધાર વરસાદે તબાહી મચાવી :15 લોકોના મોત અને ત્રણ ગુમ: ટ્રાફિક અને વીજ પુરવઠો ખોરવાયો

ફુજિયન પ્રાંતમાં ભૂસ્ખલનથી બે ઈમારતો ધરાશાયી :આઠ લોકોના મોત : યુનાન પ્રાંતના ક્યુબેઈ કાઉન્ટીમાં રસ્તાઓ, પુલ, ટેલિકોમ્યુનિકેશન અને પાવર પ્લાન્ટને નુકસાન

દક્ષિણ ચીનમાં મુશળધાર વરસાદને કારણે સર્જાયેલા અનેક અકસ્માતોમાં ઓછામાં ઓછા 15 લોકોના મોત થયા છે અને અન્ય ત્રણ લોકો ગુમ થયા હોવાના અહેવાલ છે. ચીનની સત્તાવાર ઝિન્હુઆ સમાચાર એજન્સીએ વુપિંગ કાઉન્ટીના માહિતી કાર્યાલયને ટાંકીને જણાવ્યું હતું કે ફુજિયન પ્રાંતમાં ભૂસ્ખલનથી બે ઈમારતો ધરાશાયી થઈ ગઈ હતી, જેમાં આઠ લોકોના મોત થયા હતા.

રાષ્ટ્રીય પ્રસારણકર્તા સીસીટીવીએ તેના અહેવાલમાં જણાવ્યું હતું કે યુનાન પ્રાંતમાં અન્ય પાંચ લોકોના મોત થયા હતા અને ત્રણ ગુમ થયા હતા. ગુઆંગસી પ્રદેશમાં ઝિનચેંગ કાઉન્ટીમાં શુક્રવારે ત્રણ બાળકો પૂરના પાણીમાં વહી ગયા હતા, જેમાંથી બેના મોત થયા હતા અને એકને બચાવી લેવામાં આવ્યો હતો, એમ અધિકારીઓએ જણાવ્યું હતું.

યુનાન પ્રાંતના ક્યુબેઈ કાઉન્ટીમાં રસ્તાઓ, પુલ, ટેલિકોમ્યુનિકેશન અને પાવર પ્લાન્ટને નુકસાન થયું હતું. આ સ્થળ વિયેતનામ બોર્ડરથી 130 કિમી દૂર છે. ટ્રાફિક વ્યવસ્થાને માઠી અસર થઈ છે. લોકોને અવરજવરમાં મુશ્કેલીનો સામનો કરવો પડી રહ્યો છે. વહીવટી તંત્ર દ્વારા મદદ કરવામાં આવી રહી છે.

તેના અહેવાલમાં, સિન્હુઆએ જણાવ્યું હતું કે ફુજિયાનમાં એક ફેક્ટરીના કાટમાળમાંથી પાંચ અને રહેણાંક મકાનના કાટમાળમાંથી ત્રણ મૃતદેહ મળી આવ્યા હતા. વૂપિંગ કાઉન્ટીમાં ગુરુવાર સાંજથી વરસાદ પડી રહ્યો છે. ઓનલાઈન શેર કરાયેલા એક વીડિયોમાં, શેરીઓ કાદવવાળુ પાણીથી ભરેલી છે. ઘણી જગ્યાએ રસ્તાઓ આંશિક રીતે ધોવાઈ ગયા હોવાના અહેવાલ છે.