કોરોનાગ્રસ્ત પત્નીનું ગળું કાપ્યા બાદ પતિનો મોતનો કૂદકો

બિહારના પાટનગર પટણાની હચમચાવી દેતી ઘટના : પતિ-પત્ની વચ્ચે કોઈ વાતને લઈ ઝઘડો થયો આ દરમિયાન અતુલે પોતાની પત્નીનુ બાળકો સામે બ્લેડ વડે ગળું કાપ્યું

નવી દિલ્હી, તા. ૨૬ : બિહારની રાજધાની પટણામાં હૈયુ હચમચી જાય તેવો એક મામલો સામે આવ્યો છે.પટણામાં રહેતા રેલવેના એક સ્ટેશન માસ્ટરે પોતાના બાળકોની સામે કોરોના ગ્રસ્ત પત્નીનુ ગળુ કાપી નાંખ્યુ હતુ અને પછી પોતે એપાર્ટમેન્ટમાંથી મોતનો ભૂસકો માર્યો હતો.

મળતી વિગતો પ્રમાણે સવારે સાત વાગ્યે આ ઘટના બની હતી.પટણા જંક્શન પર તૈનાત અતુલ નામના રેલવે અધિકારી અને તેમની પત્ની વચ્ચે કોઈ વાતને લઈને ઝઘડો થયો હતો.આ દરમિયાન અતુલે પોતાની પત્નીનુ બ્લેડ વડે ગળુ કાપી નાંખ્યુ હતુ.તે વખતે બે બાળકો ત્યાં જ મોજુદ હતા.બાળકોએ બૂમો પાડવા માંડી ત્યારે અતુલે બિલ્ડિંગ પરથી કુદીને આત્મહત્યા કરી હતી.

પોલીસ કઈ બાબતે પતિ પત્ની વચ્ચે ઝઘડો થયો હતો તેની તપાસ કરી રહી છે.જોકે મૃત મહિલા કોરોના પોઝિટિવ પણ હતી.તેના કારણે તબાસમાં અડચણ આવી રહી છે.પોલીસનુ કહેવુ છે કે, પત્ની કોરોના વાયરસથી સંક્રમિત થયા બાદ છેલ્લા બે ત્રણ દિવસથી પતિ અતુલ ઘભરાઈ ગયો હતો.એ પછી સોમવારે સવારે તેણે પત્નીની હત્યા કરી નાંખી હતી.

પોલીસે હાલમાં તેમના પરિવારજનોને આ વાતની જાણકારી આપી છે.તેઓ અહીંયા આવશે તે પછી મૃતદેહનો કબ્જો તેમને સોંપવામાં આવશે.