ગુરુગ્રામમાં યુવતીઓની છેડતીનો વીડિયો વાયરલ
તે સમયે યુવકે દારૂ પણ પીધો હતો : યુવતીનો દાવોે : વીડિયોમાં સ્પષ્ટ દેખાઈ રહ્યું છે કે બે યુવકો મોડી રાત્રે ઘરે પરત ફરી રહેલી યુવતીઓ સાથે અશ્લીલ વર્તન કરી રહ્યા છે
ગુરુગ્રામ,તા.૬ : સાયબર સિટી ગુરુગ્રામમાં યુવતીઓની છેડતીનો વિડીયો વાયરલ થયો છે. આ વિડીયો પીડિત છોકરીઓમાંથી એક દ્વારા બનાવવામાં આવ્યો હતો. વાયરલ થયેલા વીડિયોમાં સ્પષ્ટ દેખાઈ રહ્યું છે કે બે યુવકો મોડી રાત્રે ઘરે પરત ફરી રહેલી યુવતીઓ સાથે અશ્લીલ વર્તન કરી રહ્યા છે અને તેમના માટે અપશબ્દોનો પણ ઉપયોગ કરી રહ્યા છે. વિડીયો બનાવનારી યુવતીનો દાવો છે કે તે સમયે યુવકે દારૂ પણ પીધો હતો. ઘટનાની જાણ થતાં જ ઘટના સ્થળે પહોંચી પોલીસે યુવતીની ફરિયાદના આધારે કાર્યવાહી કરી હતી. જો કે પોલીસ પહોંચતા પહેલા આરોપી યુવક ત્યાંથી નાસી ગયા હતો. મળતી માહિતી મુજબ યુવતી મોડી રાત્રે તેમના ઘરે જઈ રહી હતી કારણ કે તેમની દાદીની તબિયત નબળી હતી.
યુવતીએ આરોપ લગાવ્યો છે કે તેઓ જ્યારે એક કેબ માટે રસ્તા પર આવી હતી ત્યારે ત્યાં દારૂ પીધેલા યુવકોએ તેમની છેડતી શરૂ કરી હતી. યુવતીઓનો આક્ષેપ છે કે જ્યારે તેઓ મુખ્ય રસ્તા પર ભાગ્યા હતા, ત્યારે બદમાશો પણ ત્યાં પહોંચી ગયા હતા અને કેબ આવ્યા પછી પણ તેમની સાથે અશ્લીલ વર્તન ચાલુ રાખ્યું હતું અને કેબને જવા દીધી ન હતી.
આ દરમિયાન એક યુવતીએ આ સમગ્ર ઘટનાનો વિડીયો રેકોર્ડ કરી લીધો હતો. જે પાછળથી સોશિયલ મીડિયા પર વાઈરલ થયો હતો. યુવતીએ આરોપ લગાવ્યો છે કે છેડતીનો વિરોધ કરવા પર આરોપી યુવકોએ બંને પર બળાત્કાર કરવાની તેમના ચહેરા પર એસિડથી બાળી નાખવાની અને જાનથી મારી નાખવાની ધમકી પણ આપી હતી. આ બનાવમાં પોલીસે કલમ ૩૪, ૩૪૧, ૩૫૪-એ, ૩૫૪-ડી અને ૫૦૬ હેઠળ ગુનો નોંધ્યો છે. આરોપીની ધરપકડ થતાં ગુરુગ્રામ પોલીસ હવે આ કેસમાં વધુ તપાસમાં લાગી ગઈ છે.