ભાજપ મુખ્યાલયે ટીકીટ વાંચ્છુકોનો જમાવડોઃ અમિતભાઈ બધાને મળ્યાઃ બાયોડેટા પણ લીધા

દિલ્હી સ્થિત કાર્યાલયે લોકસભા ટીકીટ સંદર્ભે આવેલ તમામને રાજી રાખતા રાષ્ટ્રીય અધ્યક્ષ

નવી દિલ્હીઃ લોકસભા ચૂંટણીની તારીખો જાહેર થતા રાજકીય પક્ષોમાં ટીકીટ મેળવવા દાવેદારોના રાફડા ફાટયા છે. તેવામાં ગઈકાલે બુધવારે દિલ્હી સ્થિત ભાજપ મુખ્યાલય ખાતે પણ ટીકીટની દાવેદારી કરતા સેંકડો કાર્યકર્તા અને નેતાઓ પહોચ્યાં હતા. ભાજપના રાષ્ટ્રીય અધ્યક્ષ અમિતભાઈએ આ અંગે અલગ જ રણનીતી અપનાવી હતી. તેમણે કોઈપણ કાર્યકર્તાને નારાજ કરવાનો બદલે દરેકને મળવાનું નકકી કર્યુ હતું.ટીકીટની આશાએ આવેલ બધા કાર્યકરો સાથે મુલાકાત કરવાના નિર્ણય પછી અમિતભાઈએ સંગઠન મહામંત્રી રામલાલજી  સાથે પાર્ટી મુખ્યાલયના ગ્રાઉન્ડ ફલોર ઉપર બનેલ હોલમાં ઈન્ટરવ્યુ માટે બેઠા હતા. એક પછી એક દરેકને મળ્યા હતા અને દાવેદારો પાસેથી તેમનો બાયોડેટા અને પોતાના વિસ્તારમાં તેમની કામકાજની વિગતો પણ મેળવી હતી. અમિતભાઈના આ પગલાથી તમામ ટીકીટ માટે આવેલ કાર્યકરો રાજી થયા હતા.