ટ્રમ્પની આડોડાઇ, બાઇડન માટે સરકારી પ્લેન ના મોકલ્યુ
જતાં-જતા પણ ટ્રમ્પ સીધા રહ્યા નહીં : બાઇડન પરિવાર જેવો વોશિંગ્ટન પહોંચ્યા કે તરત વ્હાઇટ હાઉસે ટ્રમ્પનો ર૦ મિનિટનો ફેરવેલ વીડિયો જાહેર કર્યો
વૉશિંગ્ટન,તા.૨૦: આજે જો બાઈડન અમેરિકાના ૪૬મા રાષ્ટ્રપ્રમુખ પદે શપથ લેવાના છે. ત્યારે તેઓ મંગળવારે ડેટાવેયરથી વોશિંગ્ટન ડીસી આવી પહોંચ્યા હતા. જતાં-જતાં પણ ટ્રમ્પ સીધા રહ્યા નહીં. જો બાઈડનને ડેલાવેયરથી વોશિંગ્ટન ડી.સી. આવવા માટે તેમણે સરકારી વિમાન મોકલ્યું નહીં. જેના કારણે તેઓ પોતાના ચાર્ટ્ડ પ્લેનથી અહીં પહોંચ્યા હતા. પોતાના ગૃહ રાજ્યમાંથી વોશિંગ્ટન ડીસી જતા પહેલા બાઈડને ફેરવેલ સ્પીચ આપી હતી. આ દરમિયાન તેમણે તેમના દિવંગત દીકરાને પણ યાદ કર્યો હતો અને ત્યાંના લોકોને 'આવજો' કહેતા પહેલા સ્ટેજ પર ચોંધાર આંસુએ રડી પડ્યા હતા. બાઈડન પરિવાર જેવો વોશિંગ્ટન ડી.સી. પહોંચ્યો કે તરત વ્હાઈટ હાઉસે ટ્રમ્પનો ૨૦ મિનિટનો ફેરવેલ વીડિયો જાહેર કર્યો હતો. જેમાં તેમણે ન તો તેમના અનુગામીના નામનો ઉલ્લેખ કર્યો કે ન તો બાઈડનને તેમની જીત બદલ અભિનંદન પાઠવ્યા. આજે પણ ટ્રમ્પ બાઈડનને અભિનંદન પાઠવ્યા વગર જ વોશિંગ્ટનથી ઉડાણ ભરશે. ઉલ્લેખનીય છે કે, ટ્રમ્પ બાઈડનની જીતને પચાવી શક્યા નહોતા અને છેવટે ૭મી જાન્યુઆરીએ તેમણે સ્વીકાર્યું હતું કે તેઓ પદ પર રહેશે નહીં. આમ છતાં, તેમણે તેમના અનુગામીને વ્હાઈટ હાઉસમાં આમંત્રિત કર્યા નહોતા. વધુમાં મેલેનિયા ટ્રમ્પે પણ જિલ બાઈડનને તેમના નવા ઘરે આમંત્રણ આપવાની ના પાડીને તેમનું અપમાન કર્યું હતું. તેનાથી તદ્દન વિપરિત, બાઈડને જ્યારે ડેલાવેયરને વિદાય આપી ત્યારે તેમના દિવંગત દીકરા બો વિશે વાત કરતાં રડી પડ્યા હતા. જેનું નિધન ૨૦૧૫માં કેન્સરના કારણે થયું હતું. વર્ષ ૨૦૦૯માં રાષ્ટ્રપ્રમુખ પદે ચૂંટાયેલા બરાક ઓબાએ ફિલાડેલ્ફિયાથી ટ્રેન લીધી હતી અને વેલિંગ્ટનમાં ઉપપ્રમુખ તરીકે ચૂંટાયેલા બાઈડન સાથે વોશિંગ્ટન ડી.સી.ની મુસાફરી કરી હતી. બાઈડને તે દિવસને યાદ કર્યો હતો અને જણાવ્યું હતું કે, એક અશ્વેત વ્યક્તિ અમેરિકાના રાષ્ટ્રપ્રમુખ બન્યા તે કેટલું મહત્વનું છે. અને આજે અમે અહીંયા છીએ. હું અને અમારો પરિવાર દક્ષિણ એશિયાના મૂળ ધરાવતી એક અશ્વેત મહિલાને મળવા અને તેમને ઉપરાષ્ટ્રપ્રમુખ પદના શપથ અપાવવા માટે વોશિંગ્ટન જઈ રહ્યા છીએ', તેમ બાઈડને કમલા હેરિસનો ઉલ્લેખ કરતાં કહ્યું હતું. તેમણે સ્પીચમાં વધુમાં કહ્યું કે, 'આ અમેરિકા છે, આ ડેલાવેયર છે. આ જગ્યા આશા, પ્રકાશ અને અમર્યાદિત શક્યતાઓથી ભરેલી છે'. આ સાથે તેમણે જ્યારે તેમના માતા-પિતાને જરુર હતી ત્યારે ઘર અને રોજગારી આપવા માટે ત્યાંના લોકોનો આભાર માન્યો હતો. તેમણે કહ્યું કે, 'જ્યારે હું મૃત્યુ પામીશ ત્યારે ડેલાવેયરને મારા હૃદય પર લખાવીને જઈશ. અમે આપ તમામને પ્રેમ કરીએ છીએ. તમે અમારી સાથે ખરાબ અને સારા સમયમાં ઉભા રહ્યા. તમે ક્યારેય અમને એકલા છોડ્યા નહીં. મને ખૂબ, ખૂબ, ખૂબ ખુશી છે કે હું ડેલાવેયરનો દીકરો છું. આજે બપોરે ૧૨ કલાકે (સ્થાનિક સમય પ્રમાણે) બાઈડન અને હેરિસ શપથ લેશે. મુખ્ય ન્યાયાધીશ જોન રોબર્ટ્સ તેમને શપથ અપાવશે. શપથ ગ્રહણ સમારોહ દરમિયાન ત્યાં ૨૫ હજારથી વધુ જવાનો સુરક્ષામાં તૈનાત રહેશે. જે બાદ બાઈડન અને કમલા હેરિસ લિંકન મેમોરિયલ રિફ્લેક્ટિંગ પૂલ જશે, જ્યાં તેઓ કોરોના મહામારીમાં મૃત્યુ પામેલા લોકોને શ્રદ્ધાંજલિ આપશે. મંગળવાર સુધીમાં અમેરિકામાં કોવિડ-૧૯ના કારણે મૃત્યુ પામનાર લોકોની સંખ્યા વધીને ૪ લાખે પહોંચી ગઈ હતી. બાઈડન અને હેરિસ કોવિડ-૧૯ પ્રોટોકોલને લઈને હંમેશા ચુસ્ત રહ્યા છે. તે સમયના રાષ્ટ્રપ્રમુખ ઓબાએ ચૂંટાયેલા રાષ્ટ્રપ્રમુખ ટ્રમ્પ અને તેમના પરિવાર માટે એર ફોર્સ જેટ મોકલ્યું હતું. જ્યારે બાઈડન સફેદ અને ગ્રે કલરના ચાર્ટર જેટ બોઈંગ બીબીજેમાં ડેલાવેયરથી વોશિંગ્ટન ડી.સી. આવ્યા હતા. ટ્રમ્પે બાઈડન માટે સરકારી વિમાન મોકલવાની ના પાડી તેને મોટા અપમાન તરીકે જોવાઈ રહ્યું છે. આ સિવાય તેમણે બાઈડન સાથે મુલાકાત કરવાની પણ સ્પષ્ટ ના પાડી દીધી હતી. ફર્સ્ટ લેડી મેલેનિયા ટ્રમ્પે પણ આવું જ કંઈક કર્યું. તેમણે જિલ બાઈડનને પરંપરા પ્રમાણે નવા ઘરની મુલાકાત કરાવવાની ના પાડી દીધી હતી.