મુખ્ય સમાચાર
News of Monday, 19th July 2021

બંદુક લઈને સાસરે પહોંચ્યો યુવકઃ પત્નિને કહ્યું: સાથ ચલોગી યા ગોલી ખાઓગી

આરોપી પતિના લગ્ન થયા બાદ જ તેની પત્નિ સાથે વિવાદ ચાલી રહ્યો હતોઃ પતિનો આરોપ છે કે તેની સાસરીના લોકો તેની પત્નીને સાસરીમાં મોકલવા માટે તૈયાર નથીઃ પતિ ડરાવવા માટે બંદુક લઈને પહોંચ્યો, પત્નિ ના મળી પણ જેલની હવા ખાવાનો વારો આવ્યો

એલાઉ, તા.૧૯: સાસરીયાઓથી નારાજ થઈને એક મહિલા તેના પિયરે ચાલી ગઈ. ઘણાં દિવસો થઈ ગયા પણ મહિલા દ્યરે પરત ના ફરી તો તેને લેવા માટે કન્નોજમાં રહેતો તેનો પતિ બંદુક લઈને તેની સાસરી અતીતગંજ પહોંચી ગયો. સાસરીમાં પહોંચીને આ પતિએ પહેલાં લોકોને બંદુક બતાવીને ડરાવ્યાં. પતિએ તેની પત્નીને બંદુક બતાવીને કહ્યું કે, સાથે આવવા માટે તૈયાર છે કે પછી ગોળી ખાઈશ. એ પછી આ પતિ બંદુક લઈને મોહલ્લામાં આંટા ફેરા મારવા લાગ્યો. મોહલ્લાના લોકો તેને હાથમાં બંદુક લઈને જોઈ જતા પોલીસને જાણ કરી. ઘટનાની જાણ થતાં જ પોલીસ ઘટના સ્થળે પહોંચી અને પતિને બંદુક સાથે ઝડપી પાડ્યો. પોલીસે આ મામલે ફરિયાદ નોંધીને પતિને જેલ ભેગો કરી દીધો. આ ઘટના એલાઉ પોલીસ સ્ટેશન હેઠળ આવતા અતીતગંજ વિસ્તારની છે. એલાઉ પોલીસ સ્ટેશનના અધિકારી સુનીલ કુમાર ભારદ્વાજે જણાવ્યું કે, પોલીસને સૂચના મળી હતી કે એક પતિ તેની પત્નીને બળજબરી રીતે સાથ લઈ જવા ઈચ્છતો હતો. પત્ની સાથે આવવા માટે તૈયાર ન હતી. તો તે બંદુક બતાવીને ધમકી આપી રહ્યો હતો. આરોપી પતિના લગ્ન બાદ જ પત્ની સાથે વિવાદ થઈ ગયો હતો. જેના કારણે તેની પત્ની પિયરમાં આવીને રહેતી હતી. દ્યટનાની જાણ થતાં જ પોલીસ ઘટના સ્થળે પહોંચી અને બંદુક લઈને મોહલ્લામાં ફરી રહેલાં આરોપી પતિ સુશીલની ધરપકડ કરવામાં આવી. તેની પાસેથી બંદુકની સાથે કારતૂસ પણ જપ્ત કરવામાં આવ્યા. પોલીસ સ્ટેશનમાં જયારે આરોપી પતિની પૂછપરછ કરવામાં આવી તો તેણે જણાવ્યું કે, તે પોતાની પત્નીને અનેક વાર સાથે રહેવા માટે કહી ચૂકયો છે, પરંતુ તેના ઘરના લોકો તેને સાસરીમાં મોકલવા માટે તૈયાર નહોતા. એટલે તેમને ડરાવવા માટે બંદુક લઈને આવ્યો હતો. ઘટના બાદ આરોપીને બંદુકના જોરે પત્ની તો ના મળી પણ બંદુક રાખવાના આરોપમાં જેલની હવા ખાવાનો વારો આવ્યો.

(11:39 am IST)