જુલાઈમાં બાળકો પર નોવાવેક્સની ક્લિનિકલ ટ્રાયલ્સ શરૂ થશે :સીરમ ઇન્સ્ટિટ્યૂટની યોજના

સપ્ટેમ્બર સુધીમાં દેશમાં નોવાવેક્સ રસી કોવાવેક્સ નામથી બજારમાં ઉપલબ્ધ કરવી શકશે

નવી દિલ્હી : સીરમ ઇન્સ્ટિટ્યૂટ ઓફ ઇન્ડિયા ટૂંક સમયમાં બાળકો માટે કોવિડ રસીનું ક્લિનિકલ ટ્રાયલ શરૂ કરવાની યોજના બનાવી રહી છે. સ્ત્રોતોને ટાંકીને એએનઆઈએ માહિતી આપી છે કે કંપની જુલાઈમાં બાળકો પર નોવાવેક્સના ક્લિનિકલ ટ્રાયલ્સ શરૂ કરવાની યોજના ધરાવે છે. સીરમ ઇન્સ્ટિટ્યૂટ ઓફ ઈન્ડિયાને આશા છે કે સપ્ટેમ્બર સુધીમાં કંપની દેશમાં નોવાવેક્સ રસી કોવાવેક્સ નામથી બજારમાં ઉપલબ્ધ કરવી શકશે.   

  નોવાવેક્સએ અમેરિકન કંપની છે, જેણે કોરોના વાયરસની રસી નોવાવેક્સ બનાવી છે, ભારતમાં, નોવાવેક્સની સીરમ સંસ્થા સાથે ભાગીદારી છે, જે કોવાવેક્સ નામથી રસી પૂરી પાડે છે.

 કેન્દ્ર સરકારે કહ્યું હતું કે કોવિડ -19 સામે નોવાવેક્સ રસીની અસરકારકતા પરિણામો આશાસ્પદ અને પ્રોત્સાહક છે અને તેની ક્લિનિકલ ટ્રાયલ્સ ભારતમાં પૂર્ણ થવાના અંતિમ તબક્કામાં છે. નીતી આયોગ સભ્ય (આરોગ્ય) વી.કે. પૌલે સંબોધન કરતાં કહ્યું કે જાહેરમાં ઉપલબ્ધ ડેટા પણ સૂચવે છે કે રસી સલામત અને ખૂબ અસરકારક છે.

તેમણે કહ્યું, “અમે ઉપલબ્ધ ડેટામાંથી જે જોઇ રહ્યા છીએ તે એ છે કે આ રસી ખૂબ સલામત અને અસરકારક છે, આ રસી ભારતમાં સીરમ સંસ્થા દ્વારા બનાવવામાં આવશે.” સીરમ ઇન્સ્ટિટ્યુટ દ્વારા પ્રારંભિક કામગીરી પૂર્ણ થઈ ચૂકી છે અને તેઓ સિસ્ટમને સંપૂર્ણ રીતે કાર્યરત બનાવવા માટે પરીક્ષણો ચલાવી રહ્યા છે જે પૂર્ણ થવાનાં અંતિમ તબક્કામાં છે.

રસી બનાવવા માટે સીરમ ઇન્સ્ટિટ્યૂટ ઓફ ઈન્ડિયા સાથે જોડાણ કરનાર નોવાવેક્સ ઇન્ક. સોમવારે જણાવ્યું હતું કે તેની રસી COVID-19 સામે ખૂબ અસરકારક છે અને વાયરસના તમામ પ્રકારો સામે રક્ષણ પૂરું પાડે છે. કંપનીએ કહ્યું કે આ રસી એકંદરે લગભગ 90.4 ટકા અસરકારક છે અને પ્રારંભિક ડેટા દર્શાવે છે કે તે સુરક્ષિત છે.