કર્ણાટકમાં ભાજપને સ્પષ્ટ બહુમતિથી દૂર રાખવા પાછળ 'નોટા' વિલન બન્યું

બેંગલુરૂ તા. ૧૭ : કર્ણાટક ચૂંટણીમાં ભાજપને બહુમતિ ન મળવા માટે 'નોટા' એટલે કે 'નન ઓફ ધ અબવ' મુખ્ય વિરોધી સાબિત થયું છે. કર્ણાટક ચૂંટણીમાં ૬ થી વધારે બેઠક એવી હતી જેમાં હારનું અંતર નોટમાં પડેલા મતથી પણ ઓછા હતા. એમાં પણ ખાસ વાત એ રહી કે નોટાના કારણે ભાજપ આ બેઠકો પર બીજા નંબરે રહી.

સૂત્રોને મળતી જાણકારી મુજબ કર્ણાટકમાં ભાજપની બહુમતિનું સમીકરણ નોટાના કારણે બગડયું છે. કર્ણાટકમાં ૦.૯ ટકા (૩,૨૨,૮૨૯) મતદારોએ નોટાના બટનનો ઉપયોગ કર્યો હતો એટલે કે કોઇપણ પક્ષના ઉમેદવારને મત આપ્યો નહોતો. દક્ષિણ બેંગલુરૂ બેઠક પર નોટા પર ૧૫,૮૨૯ સૌથી વધ મત પડ્યા.

તો બીજી ૨૮ બેઠકો પર ૨૦૦૦થી વધારે નોટાનો ઉપયોગ કરવામાં આવ્યો. જેમાં સૌથી વધારે બેઠકો શહેરી વિસ્તારની હતી. આલંદ, બાદામી, ગડગ, હિરેકરૂર, કુંડગોલ, મસ્કી, પાવાગડા અને દેવાર હિપ્પર્ગી બેઠખી એવી રહી જયાં ભાજપના જીત થઇ શકતી હતી.

પરંતુ નોટાને વધારે મત મળવાના કારણે આ બેઠકો ભાજપના હાથમાંથી કોંગ્રેસ અથવા જેડીએસ પાસે પહોંચી ગઇ. જેમાં રાજયના પૂર્વ મુખ્યમંત્રી સિદ્ઘારમૈયાને બાદામી બેઠક પર નોટાના કારણે જીત મળી. બાદામી બેઠક પર સિદ્ઘારમૈયાને ૬૭૫૯૯ મત મળ્યા જયારે ભાજપના શ્રીરામુલુને ૬૫૯૦૩ મત મળ્યા.

જેમાં ૧૬૯૬ મતથી સિદ્ઘારમૈયાને જીત મળી, જેમાં નોટામાં ૨૦૦૭ મત પડ્યા હતા. આમ રાજયની આ મુખ્યશહેરોમાં કોંગ્રેસ-જેડીએસની જીત માટે નોટા ઘણા અંશે મદદ કરી.