મુખ્ય સમાચાર
News of Monday, 16th July 2018

કોંગ્રેસ મુસ્લિમોની પાર્ટી છે : રાહુલના મતને ટેકો

કોંગ્રેસ સાંપ્રદાયિક પાર્ટી : જાવડેકર

નવી દિલ્હી,તા. ૧૬ : કોંગ્રેસ પ્રમુખ રાહુલ ગાંધી દ્વારા મુસ્લિમ બુદ્ધિજીવીઓની વચ્ચે કોંગ્રેસ પાર્ટીને મુસ્લિમોની પાર્ટી દર્શાવવાને લઈને વિવાદ હજુ શાંત થઈ રહ્યો નથી. કોંગ્રેસે ભલે ઉર્દુ અખબારના અહેવાલને ફગાવી દીધો છે. જેમાં દાવો કરવામાં આવ્યો હતો કે રાહુલ ગાંધીએ કોંગ્રેસને મુસ્લિમોની પાર્ટી તરીકે ગણાવી હતી પરંતુ હવે એજ અખબારમાં કોંગ્રેસના લઘુમતી મોરચાના પ્રમુખ નદીમ જાવેદના ઈન્ટરવ્યુમાં કહેવામાં આવ્યું છે કે રાહુલ ગાંધીએ કોંગ્રેસને મુસ્લિમોની પાર્ટી ગણાવી હતી. બીજી બાજુ ભાજપે પણ આ તકને હાથમાંથી નહીં જવા દેવાની આગાહી કરી લીધી છે.

ભાજપના વરિષ્ઠ નેતા પ્રકાશ જાવડેકરે આજે પત્રકાર પરિષદ યોજીને કહ્યું હતું કે કોંગ્રેસના આરોપોને ફગાવી દેવાની બાબત તેના પાખંડને રજુ કરે છે. જાવડેકરે કહ્યું હતું કે કોંગ્રેસ એક ઘોર સાંપ્રદાયિક પાર્ટી છે. ભાજપ નેતાએ કોંગ્રેસની નેતા શશી થરૂર ઉપર પણ પ્રહારો કર્યા હતા. થરૂરે હાલમાં જ હિન્દુ પાકિસ્તાનની વાત કરી હતી. ભાજપ નેતાએ આક્ષેપ કરતા કહ્યું હતું કે કેરળમાં કોંગ્રેસે રામાયણના સંદર્ભમાં એક કાર્યક્રમનું આયોજન કર્યું હતું પરંતુ આ કાર્યક્રમને છેલ્લી ઘડીએ રદ કરવામાં આવ્યો હતો.

(7:10 pm IST)