નવી દિલ્હીમાં બે માસુમ બાળકોને કોરોના ભરખી ગયો !!

ત્રીજી લહેરની વહેતી થયેલી આશંકાઓ વચ્ચે દિલ્હીની જીટીબી હોસ્પિટલમાં બે માસુમ બાળકોના કરૃણ મૃત્યુ થયા

નવી દિલ્હી, : કોરોના સંક્રમણની બીજી લહેરનો હજુ અંત નથી આવ્યો ત્યાં નિષ્ણાતો અને ડૉક્ટર્સ ત્રીજી લહેરમાં નાના બાળકો પર સૌથી વધુ જોખમ હોવાની ચેતવણી આપી રહ્યા છે. ત્યારે અત્યારથી જ તેની અસર પણ દેખાવા લાગી છે. છેલ્લા 2 દિવસમાં દિલ્હીમાં કોરોનાના કારણે 5 વર્ષની પરી અને 9 વર્ષના ક્રિશુનું મૃત્યુ થયું છે. દિલ્હીની જીટીબી હોસ્પિટલમાં આ બંને બાળકોની સારવાર ચાલી રહી હતી.

ઉત્તર પૂર્વીય દિલ્હીના નંદનગરી વિસ્તારમાં રહેતા પ્રહ્લાદ અને તેમના પત્ની ઉપરાંત પરિવારના સૌ સદસ્યો પરીના અકાળે અવસાનથી શોકમાં છે. કોવિડ રિપોર્ટ પોઝિટિવ આવ્યા બાદ 6 મેના રોજ પરીને હોસ્પિટલમાં દાખલ કરવામાં આવી હતી. તેને 6 દિવસ સુધી વેન્ટિલેટર પર રાખવામાં આવી હતી અને બુધવારે સારવાર દરમિયાન તેણે અંતિમ શ્વાસ લીધા હતા.

બીજી બાજુ ઉત્તર પૂર્વીય દિલ્હીની દિલશાદ કોલોનીમાં રહેતા શશાંક શેખરે પોતાના 9 વર્ષના બાળકને ગુમાવ્યો છે. તેઓ પોતે કોરોના પોઝિટિવ છે અને રાજીવ ગાંધી હોસ્પિટલમાં સારવાર અંતર્ગત છે. આ દરમિયાન ગુરૂવારે તેમના બાળકનું મૃત્યુ થયું હતું.

જીટીબી હોસ્પિટલમાંથી મળતા અહેવાલ પ્રમાણે બંને બાળકનું ઓક્સિજન લેવલ 30થી નીચે પહોંચી ગયું હતું અને લંગ્સ ઈન્ફેક્શન ખૂબ જ વધી ગયું હોવાથી તેમને બચાવવા અસંભવ થઈ ગયા હતા.