ઉત્તરપ્રદેશના બારાબંકીમાં નકલી સિમકાર્ડનું રેકેટ ઝડપાયુઃ ૨ શખ્સોની ધરપકડઃ લોકોના અંગુઠા વારંવાર લઇને સીમ અેક્ટીવ કરીને ઉંચા ભાવે વેચતા હતા
બારાબંકીઃ સિમ કાર્ડ લેતા સમયે એજન્ટ વારંવાર અંગૂઠો-આંગળી સ્કેન કરાવે, તો સાવધાન રહેજો. ઉત્તર પ્રદેશના બારાબંકીમાં નકલી સિમનું રેકેટ ઝડપાયું છે. પોલીસે બે આરોપીઓની ધરપકડ કરી છે. થંબ ઈમ્પ્રેશન લેવાના નામે લોકોના અંગૂઠા વારંવાર સ્કેન કરાવતા હતા. લોકોને આવી રીતે મૂર્ખ બનાવીને આરોપી તેમના આઈડી પર એકથી વધારે સિમ એક્ટિવેટ કરીને ઉચા ભાવે વેચતા હતા. સાઈબર સેલને ફરિયાદ મળવા પર બંનેને ઝડપી લેવામાં આવ્યા.
આરોપીઓની ઓળખ સલીમ અને સંદીપ કુમાર તરીકે કરાઈ છે. પોલીસને તેમની પાસેથી 260 ચાલુ સિમ કાર્ડ મળ્યા છે. આરોપી આ પ્રી-એક્ટિવેટેડ સિમને ખરીદનારા પાસે દાવો કરતા કે તેમને કોઈ પ્રકારની ઝંઝટનો સામનો નહીં કરવો પડે. આથી લોકો આવા સિમ મોંઘા ભાવે ખરીદતા. તેમને પોતાનું આઈડી આપવાની જરૂર નહોતી પડતી.
સરખી રીતે અંગૂઠાની ઈમ્પ્રેશન ન આવવાનું કહી ત્રણ-ચાર વખત અંગૂઠો સ્કેન કરાવતા. આવી રીતે વધારે સિમ એક્ટિવેટ કરતા હતા. આ લોકો એક વ્યક્તિના આઈડી પર પાંચ સિમ કાર્ડ જારી કરતા. લોકોની જાણકારી વિના આઈડી પર ચાલુ કરાયેલા સિમને આરોપી એકથી ત્રણ હજારમાં વેચતા હતા.
આ સમગ્ર કૌભાંડની સમજીએ તો તમારા આઈડીનો ઉપયોગ ખોટી થવાની આશંકા છે. બીજાના આઈડી દ્વારા અન્ય વ્યક્તિ સાથે કૌભાંડ અને ફ્રોડ કરવામાં આવતું હતું. આથી ગુના થવા પર નંબર ટ્રેક કરતા જેના આઈડી પર કાર્ડ લેવાયું છે તેનું જ નામ સામે આવે.
સિમનું પેકેટ પહેલાથી ખુલ્લું હોય તો ન લેશો. સીલવાળું પેકેટ લેવાનો આગ્રહ રાખો. નવું સિમ લીધા બાદ તેના પર ટેલિવેરિફિકેશન જરૂર કરો. જો એજન્ટ અથવા દુકાનદાર તેની જરૂર નથી કહીને વાત બદલે તો સમજો કે કોઈ ગરબડી છે. દુકાન કરતા વધારે સારું રહેશે તમે મોબાઈલ નેટવર્ક કંપનીના રિટેલ આઉટલેટ પર જાઓ. સિમ માટે જે દસ્તાવેજો આપો તેના પર માર્કરથી સાઈન કરો, જેથી તેનો ફરી ઉપયોગ ન થઈ શકે. વારંવાર થમ્બ ઈમ્પ્રેશન માગવામાં આવે તો ના પાડી દો. એક જ વાર અંગૂઠાનું નિશાન આપો. અન્યથા બીજા દુકાનદાર પાસે જતા રહો.