ઉત્તરાખંડના મુખ્યપ્રધાનના અંગત મોબાઇલ પર હર કી પૌડી બોમ્બથી ઉડાડી દેવાની ધમકી

દેહરાદૂન તા.૧૨: ઉત્તરાખંડના મુખ્ય પ્રધાનના અંગત મોબાઇલ નંબર પર કોઈ માથાફરેલ શખ્સે હરિદ્વાર સ્થિત 'હર કી પૌડી' ઉડાડી દેવાની ધમકી આપી છે. આ સૂચનાથી પોલીસ તંત્ર હરકતમાં આવી ગયું છે અને દેહરાદૂનથી લઈને હરિદ્વાર સુધી તપાસ હાથ ધરી છે. મુખ્ય પ્રધાનના અંગત ફોન નંબર પર ફોન આવવાથી ઉચ્ચ અધિકારીઓ પણ હેરાન છે. જ્યારે આ ફોન આવ્યો ત્યારે મુખ્ય પ્રધાનનો અંગત ફોન તેના પ્રોટોકોલ અધિકારી પાસે હતો.

પોલીસ પણ હેરાન છે કે મુખ્ય પ્રધાનનો અંગત નંબર કેવી રીતે મળ્યો હશે. મુખ્ય પ્રધાન ત્રિવેન્દ્ર સિંહ રાવતે ઘટનાની તપાસના આદેશ આપ્યા છે. પોલીસનું કહેવું છે કે આ કોઈ માથાફરેલ વ્યકિતની કરતૂત છે. જો કે મુખ્ય પ્રધાનનો અંગત નંબર તેને કઈ રીતે મળ્યો હશે એને લઈને પણ અધિકારીઓ પરેશાન છે. મુખ્ય પ્રધાનના પ્રોટોકોલ અધિકારી આનંદ સિંહ રાવતે આ મામલે ફરિયાદ નોંધાવી છે. ધમકી બાદ હર કી પૌડીઁમાં સુરક્ષા વધારી દેવામાં આવી છે. પોલીસ મુજબ શનિવારે સાંજે મુખ્ય પ્રધાનના કોન પર એક કોલ આવ્યો જેને તેના પ્રોટોકોલ અધિકારી આનંદ સિંહ રાવતે રિસિવ કર્યો. સામે છેડેથી વાત કરનારા શખ્સે હરિદ્રાર સ્થિત 'હર કી પૌડી' ઉડાડી દેવાની ધમકી આપીને ફોન કાપી નાખ્યો. અધિકારીએ જણાવ્યું કે પોલીસની ટીમ માહિતી એકત્ર કરી રહી છે. આરોપીની શોધખોળ ચાલી રહી છે. તેને જલદી જ ઝડપી લેવામાં આવશે. 'હર કી પૌડી' પર બોમ્બ સ્વોર્ડ અને ડોગ સ્કવોર્ડથી તપાસ ચાલી રહી છે.