અનોખા લગ્ન યોજાયા
એક જ મંડપમાં બે યુવતીઓ સાથે લગ્નઃ એરેન્જ અને લવ મેરેજ સાથે-સાથેઃ MPની ઘટના
ભોપાલ, તા.૧૧: મધ્ય પ્રદેશમાં એક યુવકના અનોખા લગ્નનો મામલો વાઈરલ થઈ ગયો છે. વ્યકિતએ એક જ મંડપમાં બે છોકરીઓ સાથે લગ્નના ફેરા લઈને સૌ કોઈને હેરાન કરી દીધા. હકીકતમાં એક યુવતી તેની પ્રેમિકા હતી અને બીજી યુવતી મમ્મી-પપ્પાની પસંદની હતી. અમારા સહયોગી ઈન્ડિયા ટાઈમ્સની રિપોર્ટ મુજબ, આ અનોખા લગ્નનો મામલો મધ્ય પ્રદેશના બૈતૂલનો છે. અહીં રહેનારા સંદીપ ઉઈકેએ ૮ જુલાઈએ જિલ્લાના મુખ્ય શહેરથી લગભગ ૪૦ કિલોમીટર દૂર ઘોડાડોંગરી બ્લોકના કેરિયા ગામમાં આ લગ્ન કર્યા.
'આઈએનએસ' મુજબ, કેરિયા ગામના રહેનારા સંદીપના લગ્ન જે બે છોકરીઓ સાથે થયા છે, તેમાં એક હોશંગાબાદ જિલ્લા અને બીજી ઘોડાડોંગરી બ્લોકના કોયલારી ગામની રહેનારી છે. સંદીપ હોશંગાબાદની યુવતીના સંપર્કમાં ત્યારે આવ્યો, જયારે ભોપાલમાં અભ્યાસ કરી રહ્યો હતો.
બીજી તરફ યુવકને તેના માતા-પિતાએ પરિવારની પસંદની યુવતી સાથે લગ્ન કરવા માટે કહ્યું. એવામાં મામલો વધતા પંચાયતને બોલાવવામાં આવી. જેમાં નક્કી કરાયું કે જો બંને યુવતીઓ સંદીપ સાથે લગ્ન કરવા માટે રાજી છે તો પછી તેમના લગ્ન કરાવવામાં આવશે. જેના પર બંને યુવતીઓએ સહમતિ દર્શાવી.લગ્નની સેરેમની કેરિયા ગામમાં થઈ, જેમાં વરરાજા અને બંને કન્યાઓના પરિવાર ઉપરાંત ગામના ઘણા લોકો સામેલ થયા. જનપદ પંચાયત ઘોડાડોંગરીના ઉપાધ્યક્ષ અને લગ્નના સાક્ષી મિશ્રીલાલ પરતે કહ્યું, ત્રણેય પરિવારોને આ લગ્ન માટે કોઈ આપત્તિ નહોતી અને તેમણે જાતે જ આ નિર્ણય સાથે આગળ વધવાનો નિર્ણય લીધો છે.