નોંધાવ્યો રેકોર્ડ : બધી સર્જરી ઓબેસીટીની

ઇન્દોરના ડોકટરોની કમાલ : ૧૩ કલાક ૨૦ મિનિટમાં ૫૩ લોકો ઉપર કર્યુ ઓપરેશન

ઈન્દોર તા. ૧૦ : ડોકટરની ટીમે મધ્ય પ્રદેશના ઈન્દોરમાં માત્ર ૧૩ કલાકને ૨૦ મિનિટમાં ૫૩ લોકોની મેદસ્વીતા ઘટાડવાની સર્જરી કરવાનો દાવો કર્યો છે. આ ૫૩ લોકોમાં ૧૮૨ KG વજન ધરાવતા દર્દીનો પણ સમાવેશ થાય છે. આ રેકોર્ડને વર્લ્ડ બુક ઓફ રેકોર્ડસ લંડને માન્યતા આપતા મુખ્ય સર્જન ડોકટરને સર્ટિફિકેટ આપ્યું છે.

સર્જન મોહિત ભંડારીએ જણાવ્યું કે તેમની આગેવાનીમાં ૧૧ સભ્યોની ટીમે ૧ મે સવારે ૬ વાગ્યાથી અલગ-અલગ બેરિયાટ્રિક સર્જરી (મેદસ્વીતા ઘટાડવા માટેનું ઓપરેશન) કરવાની શરૂઆત કરી જે સાંજે સાત વાગ્યાને ૨૦ મિનિટ સુધી ચાલી. આ દરમિયાન ૩૫ મહિલાઓ સહિત કુલ ૫૩ લોકોના ઓપરેશન કરવામાં આવ્યા.

તેમણે જણાવ્યું કે બેરિયાટ્રિક સર્જરી કરાવનારા ૫૩ લોકોમાં બાંગ્લાદેશ અને કેન્યાના એક-એક દર્દીનો પણ સમાવેશ થાય છે. આ દર્દીઓની ઉંમર ૨૩ થી ૮૬ વચ્ચેની છે. ભંડારીએ જણાવ્યું કે, '૧૦૦ કિલોગ્રામથી લઈને ૧૮૨ કિલોગ્રામ સુધી વજન ધરાવતા દર્દીઓની સર્જરી કરવામાં આવી હતી.'(૨૧.૪)