વડાપ્રધાન મોદી જેવા દેખાતા આ ભાઈ કોંગ્રેસ માટે કરશે પ્રચાર!

અદ્દલ વડાપ્રધાન મોદી જેવા જ દેખાતા અભિનંદન પાઠક નામના આ વ્યક્તિ વડાપ્રધાન મોદી જેવા જ કપડાં પહેરે છે અને તેમના જ અંદાજમાં વાતચીત કરે છે. આ સાથે જ તેઓ તેમની વાતની શરૂઆત પણ ‘મિત્રો’ એવું બોલીને કરે છે. વાત જાણે એમ છે કે હવે વડાપ્રધાન મોદી જેવા જ દેખાતા આ ભાઈ અભિનંદન પાઠક બીજેપી વિરૂધ્ધ કોંગ્રેસ માટે પ્રચાર કરવા જઈ રહ્યા છે.

 

દેશના વડાપ્રધાન નરેન્દ્ર મોદી જેવા જ દેખાતા અને તેમની જ અંદાજમાં વાતો કરતા અભિનંદન પાઠક નામના આ ભાઈ છત્તીસગઢના નક્સલ અસરગ્રસ્ત વિસ્તાર બસ્તર નામના ક્ષેત્રમાં કોંગ્રેસના પ્રચારક છે અને તેઓ કહે છે કે સારા દિવસો નહીં આવે. અભિનંદન પાઠક ગત મહિને જ કોંગ્રેસ નેતા રાજ બબ્બરની હાજરીમાં જ કોંગ્રેસ પાર્ટીમાં જોડાયા છે અને આ પહેલાં તેઓ ભાજપાના સહયોગીદળની સાથે જોડાયેલા હતા.

વડાપ્રધાન મોદી જેવા દેખાતા અભિનંદન પાઠકે જણાવ્યું કે કારણકે હું વડાપ્રધાન મોદી જેવો દેખાવ ધરાવું છું માટે લોકો હંમેશાં મને પૂછે છે કે સારા દિવસો ક્યારે આવશે, કે જેનો વાયદો નરેન્દ્ર મોદીએ વર્ષ 2014ની લોકસભાની ચૂંટણી પૂર્વે કર્યો હતો. અને હવે સામાન્ય માણસની સમસ્યાઓ જોઈને હું ગત મહિને ભાજપાના સહયોગીદળને છોડીને કોંગ્રેસમાં જોડાઈ ગયો છું.