અમેરિકી રાષ્ટ્રપતિ ડોનાલ્ડ ટ્રમ્પની મુશ્કેલી વધી : મહાભિયોગ પ્રસ્તાવ ચાલશે
બંધારણનું ભારે ઉલ્લંઘન કર્યું અને તેમના પદનો દુરૂપયોગ કર્યાનો આરોપ
વોશિંગટન : અમેરિકી રાષ્ટ્રપતિ ડોનાલ્ડ ટ્રમ્પ વિરુદ્ધ ચાલી રહેલા મહાભિયોગ તપાસના કેસમાં અમેરિકી સંસદના ગૃહના પ્રતિનિધિઓની અધ્યક્ષ નેન્સી પેલોસીએ જાહેરાત કરી છે કે યુએસ રાષ્ટ્રપતિ ડોનાલ્ડ ટ્રમ્પ સામે મહાભિયોગ પ્રક્રિયા ચાલશે. નેન્સી પેલોસીએ રાષ્ટ્રપતિ ડોનાલ્ડ ટ્રમ્પ વિરુદ્ધ ગૃહની ન્યાય સમિતિના મહાભિયોગની ઘોષણા કરી છે.
પેલોસીએ કહ્યું હતું કે, ડોનાલ્ડ ટ્રમ્પે રાષ્ટ્રપતિની ક્રિયાઓ દ્વારા બંધારણનું ભારે ઉલ્લંઘન કર્યું હતું. યુ.એસ. સંસદની તપાસ સમિતિના અહેવાલમાં એવું તારણ કાઢ્યું છે કે, રાષ્ટ્રપતિ ડોનાલ્ડ ટ્રમ્પે તેમના પદનો દુરૂપયોગ કર્યો છે. તેમણે આ કામ 2020 ની ચૂંટણીમાં રાજકીય લાભ મેળવવા માટે કર્યું હતું. આ સમય દરમિયાન ટ્રમ્પે વિદેશી સરકારના કામકાજમાં દખલ કરવાનો પ્રયાસ કર્યો. મહાભિયોગ હેઠળ તેની સામે કાર્યવાહીના પૂરતા પુરાવા છે.
એપ્રિલ 2019 માં, ડેમોક્રેટ સેનેટર એલિઝાબેથ વોરેને યુએસ હાઉસ ઓફ રિપ્રેઝન્ટેટિવ્સને રાષ્ટ્રપતિ ડોનાલ્ડ ટ્રમ્પ સામે મહાભિયોગ કાર્યવાહી શરૂ કરવા અપીલ કરી હતી. તેમણે આ અપીલ ચૂંટણીમાં રશિયન દખલ અંગેની તપાસના પરિણામોને ટાંકીને કરી હતી.