મેક્સિકોના સિટી હોલમાં અંધાધૂંધ ગોળીબારમાં મેયર સહિત ૧૮ લોકોના મોત
કુખ્યાત સંગઠન લોસ ટેકલેરોસે હુમલાની જવાબદારી લીધી
ન્યૂયોર્ક તા. ૬ : મેક્સિકોમાં ફરી એકવાર લોહિયાળ સંઘર્ષ જોવા મળ્યો છે. મેક્સિકોના સાન મેગુલ ટોટોલેપન સ્થિત સિટી હોલમાં બદમાશોએ અંધાધૂંધ ગોળીબાર કર્યો હતો. ફાયરિંગની ઘટનામાં ઓછામાં ઓછા ૧૮ લોકોના મોત થયા છે. મૃતકોમાં મેયર પણ સામેલ છે. જયારે ગોળીબાર થયો ત્યારે સિટી હોલ અને તેની આસપાસ અંધાધૂંધી ફેલાઈ ગઈ હતી. જો કે, એવું કહેવામાં આવી રહ્યું છે કે આ ફાયરિંગમાં મૃત્યુઆંક વધુ વધી શકે છે. આ ઘટનાનું કારણ હજુ સુધી બહાર આવ્યું નથી.
ગોળીબારની ઘટના સમયે સિટી હોલમાં મોટી સંખ્યામાં લોકો હાજર હતા. બુધવારે સાંજે થયેલી ફાયરિંગની ઘટનામાં બદમાશોએ ખતરનાક હથિયારોનો ઉપયોગ કર્યો છે. આ ઘટનાનો વીડિયો પણ સામે આવ્યો છે. જેમાં સિટી હોલની બહાર મોટી સંખ્યામાં લોહીથી લથપથ લાશો પડેલી જોવા મળી રહી છે. આ સાથે ઈમારતમાં અંધાધૂંધ ગોળીબાર કર્યા બાદ કટકાના નિશાન પણ બનાવવામાં આવ્યા છે.
સ્થાનિક મીડિયા અનુસાર, એવું કહેવામાં આવી રહ્યું છે કે આ ઘટનામાં મૃત્યુઆંક વધુ વધી શકે છે. પરંતુ સોશિયલ મીડિયા પરના વીડિયો અને તસવીરોમાં હોલની બહાર માત્ર ૧૮ મૃતદેહો પડેલા જોવા મળી રહ્યા છે. તેના આધારે અત્યાર સુધીમાં ૧૮ મૃત્યુની પુષ્ટિ કરવામાં આવી છે. મૃતકોમાં શહેરના મેયર કોનરાડો મેન્ડોઝા, તેમના પિતા, ભૂતપૂર્વ મેયર જુઆન મેન્ડોઝા અને સાત મ્યુનિસિપલ પોલીસ અધિકારીઓનો સમાવેશ થાય છે. આજુબાજુના વિસ્તારોમાં બસો અને અન્ય વાહનોને આગ ચાંપવામાં આવી હતી તેમજ સિટી હોલ પર પણ ફાયરિંગ કરવામાં આવ્યું હતું.
ગુનાહિત સંગઠન લોસ ટેકલેરોસે આ હુમલાની જવાબદારી લીધી છે. આ માટે તેણે સોશિયલ મીડિયા પર એક વીડિયો શેર કર્યો છે. મેયર કોનરાડો મેન્ડોઝા મેક્સિકોની પીઆરડી પાર્ટી સાથે સંકળાયેલા હતા. આ પાર્ટીએ પણ મેયરના મૃત્યુની પુષ્ટિ કરી છે. પાર્ટીએ તેમના મૃત્યુની નિંદા કરી છે અને બધાને શાંતિ જાળવવા અપીલ કરી છે. આ સાથે આ ઘટનામાં મૃત્યુ પામેલા લોકોને ન્યાય મળે તેવી માંગ કરવામાં આવી છે. મેક્સિકોમાં આ ઘટના છેલ્લા કેટલાક અઠવાડિયામાં આ પ્રકારની ત્રીજી ઘટના છે.
આ વર્ષે ૨૧ સપ્ટેમ્બરની રાત્રે મધ્ય મેક્સિકન રાજય ગુઆનાજુઆટોમાં પણ ગોળીબાર થયો હતો. આમાં પણ ૧૦ લોકોના મોત થયા હતા. એક અઠવાડિયા પછી, ઉત્તરી મેક્સિકોમાં ફરીથી આવી જ ઘટના જોવા મળી. કાલેરા, જેકેટાસ અને અન્ય પાંચ પોલીસકર્મીઓ પણ માર્યા ગયા હતા.