યુપીના ખેતમજૂર યુવકે જાણીતા ગેમ શોમાં ૫૦ લાખ જીત્યા
નાનકડા ગામના યુવાનની ઊંચી ઊડાન : નાના ગામમાં રહેતા તેજ બહાદૂરના ઘરમાં લાઈટ જ નથી, એન્જિ.નું ભણવા માતાના ઘરેણાં ગીરવે મૂકવા પડ્યા હતા
બરેલી, તા. ૫ : સંસ્કૃત ભણાવતા શિક્ષકનો ૨૦ વર્ષનો છોકરો તેજ બહાદુર સિંહ રાતો રાત લાખોપતિ બની ગયો. તેના ઉત્તર પ્રદેશના દેઓરાનિયામાં રહેતા તેજ બહાદુરના ઘરમાં લાઈટ પણ નથી, પરંતુ તેજ બહાદુરે લોકપ્રિય ગેમ શોમાં રૂ. ૫૦ લાખની મોટી રકમ જીતી.
એક દિવસે આઈએએસ અધિકારી બનવાનું સપનું જોતો તેજ બહાદુર બરેલી જિલ્લામાં ખેતમજૂર તરીકે પાર્ટ ટાઈમ કામ કરે છે. લોકડાઉન દરમિયાન તેણે અભ્યાસ ચાલુ રાખ્યો અને ટ્યુશન પણ લીધા હતા. તેના માતા રાજકુમારીએ દીકરાનો ડિપ્લોમા કોર્સમાં અભ્યાસ માટે દાગીના પણ ગીરવે મૂકવા પડ્યા હતા.
હવે તેજ પોતાની જીતના આ પૈસાથી સૌથી પહેલા માતાના ગીરવે મૂકેલા દાગીના પાછા લાવશે અને પોતાનો તથા નાના ભાઈઓનો અભ્યાસ પૂરો કરશે. ઉપરાંત તે પોતાના માટે એક ઘર અને સ્કૂલ બનાવવા ઈચ્છે છે, જેમાં પાડોશના બાળકો આવી શકે.
તેજ જણાવે છે, લોકડાઉન દરમિયાન મારા પિતાએ નોકરી ગુમાવી દીધી. તેઓ બીમાર હતા અને પરિવારની જવાબદારી મારા પર આવી ગઈ. મારે ખેત મજૂર તરીકે કામ શરૂ કરવું પડ્યું. મને આ કામની આદત નહોતી. તેજ હાલમાં પોલિટેકનિક કોલેજમાંથી સિવિલ એન્જિનિયરિંગનો અભ્યાસ કરી રહ્યો છે.
તેજ હજુ પણ આગળ અભ્યાસ કરવા ઈચ્છે છે, પરંતુ મહિને માત્ર ૫,૫૦૦ રૂપિયાની આવક ધરાવતા તેના પિતા હરચરણ સિંહ આ માટે તૈયાર નથી. હરચરણે પોતાના બે દીકરાઓના અભ્યાસ અને ઘરનું ગુજરાન ચલાવવાનું હોય છે. હરચરણ કહે છે, આથી મારી પત્નીએ તેજ માટે પોતાના દાગીના ગીરવે મૂકવા પડ્યા હતા. દીકરાની સફળતા પાછળ તે જ જવાબદાર છે. પોતાના આઈએએસ બનવાના સપના વિશે તેજ કહે છે, આ પાછળ બે કારણો છે, પહેલું હું ગ્રામિણ બેકગ્રાઉન્ડથી આવું છે અને હું અન્ય શહેરોના બાળકોને તેમનો ઉચ્ચ અભ્યાસ પૂરો કરવામાં મદદ કરવા ઈચ્છું છું. બીજુ મેં ખેતરમાં કામ કર્યું છે આથી હું ખેડૂતોને પણ થોડી સહાય કરવા ઈચ્છું છું.