મુખ્ય સમાચાર
News of Thursday, 5th August 2021

પ્રેમિને પામવા પતિની હત્યા કરનાર પત્ની-પ્રેમીની ધરપકડ

લગ્ન બાદ પતિ-પત્ની બંનેના અન્ય સાથે અફેર હતા : યુવકની લાશ કેબમાં મંખોલી નાકા પાસે મળી હતી, જે બાદ પોલીસે હત્યાના આરોપીઓની શોધ શરૂ કરી હતી

થાણે, તા. : લગ્ન જીવન પછી પ્રેમ સંબંધોના કારણે આફત આવી પડતી હોય છે. આવામાં મુંબઈ પાસેના થાણેમાં પતિ અને પત્ની બન્નેના લગ્ન પછી પ્રેમ સંબંધ ચાલુ હતા, જેના કારણે બન્ને વચ્ચે પતિ-પત્ની જેવા સુખમય સંબંધો નહોતા, આવામાં પત્નીએ પોતાના પ્રેમીને પામવા માટે તેની સાથે મળીને પતિને મોતને ઘાટ ઉતારી દીધો હતો. હવે પોલીસે તપાસ દરમિયાન કથિત હત્યા કેસમાં પત્ની અને પ્રેમીની ધરપકડ કરી લીધી છે. થાણેમાં પોલીસે ૩૨ વર્ષની પરિણીતા અને તેના પ્રેમીને પતિની કથિત હત્યાના ગુનામાં ઝડપી લીધા છે. ૩૮ વર્ષના યુવકની લાશ કેબમાં મંખોલી નાકા પાસેથી મળી આવી હતી, જે બાદ પોલીસે હત્યાના આરોપીઓની શોધખોળ શરુ કરી હતી.

ચાલાક પત્નીએ પોલીસથી બચવા માટે પોતાના પતિની હત્યાની ફરિયાદ નોંધાવી હતી. પોલીસે કેસની તપાસ માટે અજાણી વ્યક્તિ સામે હત્યાનો ગુનો નોંધીને તપાસ શરુ કરી હતી. પોલીસને કેસની તપાસ દરમિયાન જાણવા મળ્યું કે, મૃતક પહેલા પાવરલૂમ ફેક્ટરીમાં કામ કરતો હતો, પરંતુ કોરોના વાયરસના લીધે જાહેર કરાયેલા લોકડાઉન દરમિયાન તેણે નોકરી ગુમાવી દીધી હતી. પછી યુવકે પોતાનું ઘર ચલાવવા માટે ડ્રાઈવર તરીકે નોકરી કરીને કેબ ચલાવવાનું શરુ કર્યું હતું.

પોલીસ તપાસમાં પણ સામે આવ્યું કે, મૃતક પતિ અને તેની હત્યા કરનારી પત્ની બન્નેના લગ્ન પછી આડા સંબંધો ચાલતા હતા. જેના કારણે પત્નીએ છૂટાછેડા લેવાની માગણી કરી હતી, જોકે, પતિએ પત્નીના લફડાનો વાંધો ઉઠાવ્યો હતો અને જેના લીધે બન્ને વચ્ચે ખટપટ થતી રહેતી હતી.

પરિણીતાને લાગ્યું કે હવે તેનો પતિ તેને છૂટાછેડા નહીં આપે અને તેને પોતાના પ્રેમી સાથે રહેલામાં મુશ્કેલીઓનો સામનો કરવો પડશે, પછી પરિણીતાએ પોતાના પતિને કાંટો સમજીને તેને પતાવી દેવાની યોજના બનાવી હતી. જેમાં તેને તેના પ્રેમી તથા મિત્રએ સાથ આપ્યો હતો. ત્રણે જણાએ પરિણીતાના પતિને મોતને ઘાટ ઉતારવા માટે હત્યારાને રૂપિયા એક લાખ આપીને પ્લાન બનાવ્યો હતો. હત્યારાને એક લાખ રૂપિયા આપવા માટે આરોપી મહિલાએ પોતાના દાગીના પણ વેચી દીધા હતા.

પોલીસને તપાસમાં જાણવા મળ્યું કે, જુલાઈ ૩૧ની રાત્રે પરિણીતા ૩૮ વર્ષના પતિની માટે ભાડે રાખેલા લોકો હત્યા કરવા માટે ભાડે કેબ કરીને મૃતકનો પીછો કર્યો હતો. પછી બે જણાએ મંખોલી પાસે શખ્સનો સંપર્ક કરીને તેનું ગળું દાબી દીધું હતું, જેનાથી તેનું મોત થઈ ગયું હતું. પછી લાશને કેબમાં છોડીને હત્યારા ત્યાંથી ભાગી ગયા હતા.

બુધવારે પોલીસ દ્વારા મૃતકની પત્ની, તેના પ્રેમી અને મિત્રની હત્યાના ગુનામાં ધરપકડ કરી લીધી છે. જોકે, હત્યા કરનારા બે લોકો હજુ પણ ફરાર છે. પકડાયેલા આરોપીઓના ૧૩ ઓગસ્ટ સુધી રિમાન્ડ લેવામાં આવશે. દરમિયાન કેટલાક મહત્વના ખુલાસા થશે.

(9:07 pm IST)