પુત્રી જન્મી તેની ખુશાલી સલમાને ૩ સલૂનમાં કરી ફ્રી સર્વિસ

લોકો ઉમટી પડયા

ગ્વાલિયર, તા.૫: મધ્ય પ્રદેશના ગ્વાલિયરમાં સલૂન સંચાલક સલમાનના દ્યરે દીકરીનો જન્મ થયો હતો. પુત્રીનો જન્મ થવાની ખુશીમાં પિતા સલમાને ગ્વાલિયરમાં પોતાના ત્રણેય સલૂનમાં ફ્રી સર્વિસ જાહેર કરી હતી. આ દરમિયાન બધા સલુન્સની બહાર ફ્રી સર્વિસના પોસ્ટરો લગાવવામાં આવ્યા હતા. હવે સલમાનની સોશિયલ મીડિયા પર ઘણી ચર્ચા થઈ રહી છે. સલમાન પોતે સલૂન આવતા લોકોની સર્વિસ આપી રહ્યો હતો.

પ્રાપ્ત વિગતો મુજબ ગ્વાલિયરના મુરાર વિસ્તારમાં રહેતો સલમાન વ્યવસાયે સલૂન સંચાલક છે. પત્નીએ ૨૬ ડિસેમ્બરના રોજ પુત્રીને જન્મ આપ્યો હતો. દ્યરે દીકરીનો જન્મ થતાં સલમાની ખુશીનો પાર ન રહ્યો. ત્યારબાદ સલમાને ૪ જાન્યુઆરીએ તેના તમામ સલુન્સમાં ફ્રી સર્વિસ જાહેર કરી હતી. ત્યારબાદ ત્રણેય સલૂનમાં મોટી સંખ્યામાં લોકોના ટોળા ઉમટી પડ્યા હતા. તેમ છતાંય સલૂન આવતા બધા લોકોને ફ્રી સર્વિસ આપી હતી.

સલમાનનું કહેવું છે કે લોકો પુત્ર અને પુત્રી વચ્ચે ભેદભાવ રાખે છે, પરંતુ દીકરા કરતાં દીકરી મળતાં અમને વધારે આનંદ છે. આ કારણોસર, મેં એવું કંઈક કર્યું છે જે સમાજ માટે એક ઉદાહરણ બની શકે. સલમાનની આ પહેલથી શહેરના લોકો પણ ખૂબ ખુશ છે.

ઘરે દીકરીનો જન્મ થતાં ૪ જાન્યુઆરીના રોજ અમારા બધા સલૂન (સલમાન મેન્સ પાર્લર- કુમ્હરપુરા, અરબાઝ મેન્સ સલૂન- શિવાજી નગર, અરબાઝ-૨ મેન્સ સલૂન- ટાલ રોડ કબીર કોલોની)માં ફ્રી સર્વિસ રહેશે.

જણાવી દઈએ કે, સલમાનના લગ્ન ૨ વર્ષ પહેલા થયા હતા. પુત્રીનો જન્મ ૨૬ ડિસેમ્બરના રોજ થયો હતો. પુત્રી આયત હાલ ૧૦ દિવસની છે. સલમાને કહ્યું કે અમે આ દિવસે સેંકડો લોકોને મફત સેવા આપી છે.