યુવતીને પેટમાં થઈ રહ્યું હતું દર્દ : ઓપરેશન કર્યુ તો ૭ કિલોનો વાળનો બોલ બહાર આવ્યો
ઝારખંડના બોકારો જિલ્લાની આ વાત છે. અહીં એક છોકરીને પેટનો દુખાવો ઉપડ્યો હતો. ૧૭ વર્ષની છોકરી ડોકટર પાસે ગઈ. પેટનું ઓપરેશન કરવામાં આવ્યું. પેટમાં શું હતું તે જાણીને ચોંકી જશો. પેટમાંથી ૭ કિલો વાળનો એક બોલ બહાર આવ્યો.સર્જન ડોકટર જી.એન. સાહુએ આ ઓપરેશન કર્યું હતું. તેમણે કહ્યું કે આ ખૂબ જ મુશ્કેલ ઓપરેશન હતું કારણ કે વાળનો આ બોલ પેટમાં ફેલાઈને પડ્યો હતો.
યુવતીના પેટમાંથી વાળનો બોલ મળ્યાની ઘટના પણ ખૂબ જ વિચિત્ર છે. ડો.સાહુએ કહ્યું કે ૧૭ વર્ષની સ્વિટી કુમારીને બાળપણમાં વાળ ખાવાની ટેવ હતી. જયારે તેના વાળ પડતા ત્યારે તે તેને ખાઈ જતી. પરંતુ તેણે છેલ્લા પાંચ વર્ષથી આ ટેવ છોડી દીધી હતી.
પરંતુ બન્યું એમ કે બધા વાળ એક જ જગ્યાએ એકઠા થઈ ગયા. ધીરે ધીરે તે એક બોલ બની ગયો. બોકારોની ખાનગી હોસ્પિટલમાં સારવાર કરવામાં આવી. આ બોલને દૂર કરવામાં ૬ કલાક જેટલો સમય લાગ્યો. ડોકટર સાહુએ જણાવ્યું હતું કે ૪૦ વર્ષની કારકિર્દીમાં પહેલીવાર તેમણે દર્દીના પેટમાં આટલા બધા વાળ જોયા છે. હવે સ્વીટીને સારૂ છે અને સ્વસ્થ થઈ રહી છે.