૨૪મીએ રૂસ કરશે મહાહુમલો : ૫ લાખ સૈનિકો સરહદે તૈનાત કર્યા : તે દિવસે ૧ વર્ષ પુરૂ થશે
યુક્રેનનો દાવો
નવી દિલ્હી તા. ૨ : યુક્રેનના સંરક્ષણ પ્રધાન ઓલ્કેસી રેઝનિકોવે દાવો કર્યો છે કે રશિયા યુક્રેન પર મોટા હુમલાની તૈયારી કરી રહ્યું છે. રેઝનિકોવને ડર હતો કે આ ૨૪ ફેબ્રુઆરીના રોજ અથવા તેની આસપાસ થઈ શકે છે. જણાવી દઈએ કે યુક્રેન પર રશિયાના હુમલાને ૨૪ ફેબ્રુઆરીએ એક વર્ષ પૂર્ણ થશે. આવી સ્થિતિમાં યુદ્ધની પ્રથમ વર્ષગાંઠ પર રશિયા યુક્રેન પર મોટો હુમલો કરી શકે છે. આ સિવાય રશિયા ૨૩ ફેબ્રુઆરીએ પોતાનો સૈન્ય દિવસ ઉજવે છે, આવી સ્થિતિમાં આ દિવસે પણ રશિયા યુક્રેન પર જોરદાર હુમલો કરે તેવી સંભાવના છે.
યુક્રેનના સંરક્ષણ પ્રધાને કહ્યું કે રશિયા લગભગ અડધા મિલિયન સૈનિકો એકઠા કરી રહ્યું છે. રશિયાના રાષ્ટ્રપતિ વ્લાદિમીર પુતિને ગયા વર્ષે સપ્ટેમ્બરમાં સરહદ પર ત્રણ લાખ સૈનિકો તૈનાત કરવાની જાહેરાત કરી હતી. હવે યુક્રેનના રક્ષા મંત્રીએ કહ્યું છે કે આ આંકડો ત્રણ લાખ કરતા ઘણો વધારે છે. તે જ સમયે, યુએસ સ્થિત ઇન્સ્ટિટ્યૂટ સ્ટડી ઓફ વોર એ દાવો કર્યો છે કે રશિયા યુક્રેનના પૂર્વ ભાગમાં મોટો હુમલો કરી શકે છે. જો કે યુક્રેને પણ રશિયાને ટક્કર આપવાની વાત કરી છે.
યુક્રેનના સંરક્ષણ પ્રધાન MG-200 એર ડિફેન્સ રડારની ખરીદી માટે ફ્રાંસની મુલાકાતે છે. યુક્રેને હાલમાં જ યુરોપિયન દેશો પાસેથી ફાઈટર જેટની માંગણી કરી છે. તાજેતરમાં જ જર્મની, યુએસ અને યુકેએ યુક્રેનને ટેન્કો મોકલવાનું નક્કી કર્યું. યુક્રેનની ગુપ્તચર સેવાના અહેવાલ મુજબ રાષ્ટ્રપતિ વ્લાદિમીર પુતિને તેમના સૈનિકોને વસંતઋતુ પહેલા ડોનબાસ પ્રદેશને ફરીથી કબજે કરવા સૂચના આપી છે. હાલમાં ડોનબાસમાં રશિયન સૈનિકો અને યુક્રેનિયન સેના વચ્ચે ભીષણ લડાઈ ચાલી રહી છે. યુક્રેનના રાષ્ટ્રપતિ ઝેલેન્સકીનું કહેવું છે કે આગામી દિવસોમાં લડાઈ વધુ ગંભીર બની શકે છે.