Gujarati News

મુંબઈ, તા.૩૧ : બોલિવુડ સેલેબ્સના અંગત જીવનમાં શું ચાલી રહ્યું છે તે જાણવા માટે સૌ કોઈ ઉત્સુક રહે છે. જિમ, શોપિંગ તો ક્યારેય મીટિંગ માટે ઘર બહાર નીકળેલા સેલેબ્સની પાછળ-પાછળ ફોટોગ્રાફર્સ કેમેરા લઈને દોડી જાય છે અને તેની ઝલક ક્લિક કરવા માટે પડાપડી કરે છે. તો બીજી તરફ સેલિબ્રિટી પણ ફોટોગ્રાફર્સ સાથે શાંતિથી વાત કરે છે અને પોઝ પણ આપે છે.

હાલમાં જ એક્ટ્રેસ શ્રદ્ધા કપૂર ફિલ્મના સેટ પર સ્પોટ થઈ હતી. આ દરમિયાન કંઈક એવું થયું જેના વિશે શ્રદ્ધા કપૂરે પણ નહીં વિચાર્યું હોય. વાત એમ છે કે, શ્રદ્ધા કપૂર ફિલ્મનું શૂટિંગ કરી રહી હતી. હંમેશાની જેમ વાદળી ડ્રેસમાં સુંદર લાગી રહી હતી. આ દરમિયાન તે કોઈ ખાસ વ્યક્તિ સાથે ફોનમાં ચેટ કરવામાં વ્યસ્ત હતી. ફોટોગ્રાફર્સ આવીને તેની તસવીરો લેવા લાગ્યા હતા.

પરંતુ તેને ક્યાં ખબર હતી કે તેની સાથે તસવીરો ક્લિક થઈ રહી છે તેમાં તેની ચેટ પણ દેખાઈ રહી છે. સામે આવેલી તસવીરમાં તે કોઈ ખાસ વ્યક્તિની સાથે ચેટ કરતી જોઈ શકાય છે. ચેટમાં વ્યક્તિના નામના બદલે ત્રણ હાર્ટ ઈમોજી હતી. ચેટમાં એક્ટ્રેસે લખ્યું કે હું ક્યારેય મારા જીવનમાં તારા જેવા વ્યક્તિને નથી મળી. જેના જવાબમાં લખેલું છે મને ખુશી છે કે તું આ રીતે વિચારે છે.

જે બાદ શ્રદ્ધાનો મેસેજ છે કે તું સાચેમાં સાંભળે છે, આવું કોઈ રહ્યું નથી. તું મને ગ્રેટ ફીલ કરાવે છે. જેના પર રિપ્લાયમાં હાર્ટ ઈમોજી આવે છે. તો ફરીથી એક્ટ્રેસ લખે છે હા, તું કરાવે છે. મારા તમામ સપના અને ઈચ્છાઓ પૂરી કરવા માટે આભાર. જેના પર જવાબ આવે છે આ મારું સૌભાગ્ય છે. જ્યારે પણ કંઈ જોઈએ, મને કહેજે. શ્રદ્ધા કપૂર ફોટોગ્રાફર રોહન શ્રેષ્ઠા સાથે રિલેશનશિપમાં હોવાની ઘણા સમયથી ચર્ચા થઈ રહી છે.

તેથી આ ચેટમાં તે તેની સાથે વાત કરી રહી હોવાની અટકળો ચાલી રહી છે. શ્રદ્ધા કપૂરની ચેટ વાંચીને ભલે કેટલાક લોકો ખુશ થયા હોય પરંતુ તેના ફેન્સને આ વાત પસંદ આવી નથી. એક ફેને લખ્યું છે 'આ તો પ્રાઈવસીનો ભંગ છે'. બીજા ફેને લખ્યું છે મેનર્સ જેવું કંઈ છે કે નહીં. આ ખોટું છે. તો કેટલાક તસવીરને એડિટિંગ પણ ગણાવી રહ્યા છે. પ્રોફેશનલ ફ્રંટની વાત કરીએ તો, શ્રદ્ધા કપૂર પાસે રણબીર કપૂર સાથેની લવ રંજનની એક ફિલ્મ છે. આ સિવાય તે નાગિનમાં પણ જોવા મળશે.