Gujarati News

કાનપુર તા. ૩૧ : લગ્ન બાદ પતિ-પત્ની વચ્ચે તણાવ અને તલાકની ખબર તો તમે ઘણીવાર સાંભળી હશે. પરંતુ કાનપુરમાં એક પતિએ ઉદાર દિલ બતાવ્યું અને પત્નીના લગ્ન તેના મનપસંદ યુવક સાથે કરાવી આપી. મંગળવારે કાનપુરના સનિગવાં એરિયામાં પોલીસની ઉપસ્થિતિમાં થયેલા લગ્નમાં મહિલાના પતિએ ખૂબ ડાન્સ કર્યો. બંનેના લગ્ન લગભગ ૪ મહિના પહેલા થયા હતા.

ફતેહપુરની શાંતિના લગ્ન પાછલી ૧૯ ફેબ્રુઆરીએ સમુહ લગ્ન કાર્યક્રમમાં કાનપુરના ગોપાલ ગુપ્તા સાથે થયા હતા. લગ્નમાં ૪ દિવસ બાદ જ શાંતિ પોતાના પિયર પાછી આવતી રહી. બે દિવસ બાદ તે સાસરે પાછી આવી તો તેની સાથે લખનઉના મોહનલાલગંજનો યુવક રવિ યાદવ પણ હતો. શાંતિએ ગોપાલને કહ્યું કે રવિ તેના માસીનો દીકરો છે. જાણકારી મુજબ, સોમવારે સાંજે શાંતિ અને રવિ રિક્ષા દ્વારા કયાંક જઈ રહ્યા હતા, ત્યારે જ રસ્તામાં ગોપાલ મળી ગયો.

શાંતિએ ગોપાલને કહ્યું કે તે એક સંબંધીના ત્યાં બર્થડે પાર્ટીમાં જઈ રહી છે અને એક-બે દિવસમાં પાછી આવતી રહેશે. ગોપાલને શંકા જતા તેણે પત્ની પાસેના સામાનને ચેક કર્યો તો તેમાં ઘરેણાં હતા. ગોપાલ બંનેને પાછા ઘરે લઈ ગયો. ઘરમાં કેટલાક સંબંધીઓ આવ્યા અને પંચાયત શરૂ થઈ. આ વચ્ચે મોડી રાત્રે શાંતિએ ફાંસી લગાવવાનો પ્રયાસ કર્યો. તો વાત પોલીસ સુધી પહોંચી ગઈ. પોલીસે બધા પક્ષોને પોલીસ સ્ટેશન બોલાવ્યા.

પોલીસ સ્ટેશનમાં સમગ્ર રાત સુધી ચાલેલી પૂછપરછમાં શાંતિએ જણાવ્યું કે તે રવિને પસંદ કરે છે. આ બાદ ગોપાલે નક્કી કર્યું કે તે શાંતિના રવિ સાથે લગ્ન કરાવશે. મંગળવારે બપોરે પોલીસ સ્ટેશન પાસે એક ઘરમાં શાંતિ અને રવિના લગ્ન થયા. તેમાં ગોપાલે ખૂબ ડાન્સ કર્યો અને પત્નીને વિદાઈ કરી.