Gujarati News

Gujarati News

News of Wednesday, 31st March 2021

પુણેમાં કિશોરી પર ગેંગ રેપ બાદ છાતીમાં ગોળી મારી

પૂણેની ગેંગ રેપની ચોંકાવનારી ઘટના : ગભરાયેલી પીડિતાએ ફરિયાદ ન કરી પણ પિસ્તોલ સાથે ઝડપાયેલા શખ્સને લીધે સમગ્ર ઘટનાનો ભાંડો ફૂટી ગયો

પુણે : ૧૪ વર્ષની એક છોકરી પર ગેંગરેપ કરનારા આરોપીઓએ તેની છાતીમાં ગોળી મારી, જોકે શર્ટના ખિસ્સામાં પડેલા મોબાઈલને કારણે પીડિતાનો ચમત્કારિક બચાવ થયો હોવાની એક ચોંકાવનારી ઘટના પુણેમાં બની છે. પીડિતા સાથે આ ઘટના ૧૫ દિવસ પહેલા બની હતી. જોકે, તે એટલી બધી ડરેલી હતી કે તેણે આ અંગે કોઈને વાત નહોતી કરી.

પોલીસે આ ઘટનાનો પત્તો કઈ રીતે લગાવ્યો તે પણ કોઈ ફિલ્મી સ્ટોરીથી કમ નથી. પુણે ક્રાઈમ બ્રાંચની ટીમે પિસ્તોલ સાથે શ્રીકાંત રાજેન્દ્ર કાલે નામના ૨૩ વર્ષના એક યુવકને પકડ્યો હતો. તેની પાસેથી ત્રણ બુલેટ પણ મળી હતી. હથિયારને ચેક કરતાં પોલીસને જાણવા મળ્યું હતું કે તેનો તાજેતરમાં જ ઉપયોગ પણ થયો છે. પોલીસે શ્રીકાંતની આકરી પૂછપરછ કરતાં તેણે કબૂલ્યું હતું કે તેના એક મિત્રએ પિસ્તોલમાંથી ફાયરિંગ કર્યું હતું.

પુણે ક્રાઈમ બ્રાંચના પીઆઈ મહેન્દ્ર જગતાપના જણાવ્યા અનુસાર, ૨૬મી માર્ચે શ્રીકાંત હથિયાર સાથે પોલીસના હાથે ઝડપાયો હતો. પોલીસે તેની સામે આર્મ્સ એક્ટ હેઠળ ગુનો દાખલ કરીને તપાસ શરુ કરી હતી. જોકે, પિસ્તોલમાંથી ફાયરિંગ થયું હોવાની જાણ થતાં તપાસમાં એક નવો જ એંગલ સામે આવ્યો હતો. આરોપી શ્રીકાંતે પોલીસને કહ્યું હતું કે તેના એક મિત્રએ એક છોકરીને ડરાવવા માટે પિસ્તોલમાંથી ફાયરિંગ કર્યું હતું.

આરોપીએ પોલીસને એમ પણ કહ્યું હતું કે, છોકરીની છાતી પર ફાયરિંગ કરાયું હતું, પરંતુ તેણે પહેરેલા શર્ટના ખિસ્સામાં એક મોબાઈલ ફોન હતો. જેના કારણે છોકરીનો જીવ બચી ગયો હતો. આ માહિતી મળતા જ પોલીસે ભોગ બનનારી છોકરીને પણ શોધી કાઢી હતી. તેનું કાઉન્સેલિંગ કરીને તેની સાથે જે થયું તે અંગે એફઆઈઆર કરાવવા માટે છોકરીને તૈયાર કરવામાં આવી હતી. પીડિતાએ પોતાની ફરિયાદમાં જણાવ્યું હતું કે, આરોપી તેને બર્થડે પાર્ટીનું કહીને એક ફ્લેટ પર લઈ ગયો હતો. જોકે, ફ્લેટ પર તેના પર પાંચ શખ્સોએ ગેંગરેપ ગુજાર્યો હતો. પોતાના પર ગેંગરેપ કરનારા તમામ પાંચ શખ્સોને પીડિતા ઓળખતી પણ હતી. છોકરીની જુબાનીના આધારે પોલીસે રોહન ઓવહાલ, નિલેશ શિંદે નામના બે આરોપીઓ ઉપરાંત, બે માઈનોરની પણ ધરપકડ કરી લીધી છે, જ્યારે હથિયાર સાથે ઝડપાયેલો પાંચમો આરોપી ક્રાઈમ બ્રાંચની કસ્ટડીમાં જ છે. પોલીસ તપાસમાં એમ પણ બહાર આવ્યું હતું કે, છોકરીના માતાપિતાએ છૂટાછેડા લઈ લીધા છે અને તે પોતાની દાદી સાથે રહે છે. છોકરી પાર્ટીમાં પોતાની અન્ય એક દોસ્ત સાથે ગઈ હતી. જોકે, તે પાર્ટી પછી ઘરે જવા નીકળી રહી હતી ત્યારે એક છોકરાએ તેને રોકી હતી. છોકરીએ ઘરે જવાની જીદ કરતા આરોપીએ તેના પર પિસ્તોલ તાંકી દીધી હતી.

(12:00 am IST)