Gujarati News

બિજનૌર, તા. ૩૦ : દૂધનો ધંધો કરતા ૨૩ વર્ષના એક યુવકના મર્ડર કેસમાં પોલીસને તેના પાકીટમાંથી મળેલા એક છોકરીના ફોટોના આધારે પોલીસ ગણતરીના સમયમાં જ આરોપી સુધી પહોંચી ગઈ હતી. મૃતકની ગોળી મારીને હત્યા કરી દેવામાં આવી હતી. પોલીસે તપાસ કરી ત્યારે મૃતકના પાકીટમાંથી તેનું આધાર કાર્ડ, એક પેકેટ અને એક છોકરીનો ફોટો મળી આવ્યા હતા. ફોટોના આધારે છોકરીની ઓળખ મેળવાતા જ આ કેસ ઉકેલાઈ ગયો હતો.

આ ઘટના ઉત્તર પ્રદેશના બિજનૌરની છે. જેમાં દૂધનો ધંધો કરતા ૨૩ વર્ષના રાજવીર સિંહની અજાણ્યા શખ્સોએ ગોળી મારીને હત્યા કરી નાખી હતી. ૨૬ જૂનના રોજ બનેલી આ ઘટનામાં પોલીસને તેના પાકીટમાંથી છોકરીનો ફોટો મળ્યો હતો. તપાસ કરવા પર છોકરી મુકરપુર ગામની હોવાનું જાણવા મળ્યું હતું. આ ગામમાં જ રાજવીર સિંહ દૂધનું કલેક્શન કરવા માટે જતો હતો.

જે છોકરીનો ફોટો મળ્યો તે રાજવીરની પ્રેમિકા હતી. પોલીસ તેના ઘરે પહોંચી ત્યારે તેને પહેલી શંકા છોકરીના ભાઈ પર ગઈ હતી. પોલીસે છોકરીના ૧૬ વર્ષના ભાઈની કડકાઈથી પૂછપરછ કરતાં જ તેણે વટાણા વેરી દીધા હતા, અને પોતે જ રાજવીરની હત્યા કરી હોવાની કબૂલાત કરી લીધી હતી. આરોપીએ જણાવ્યું હતું કે તેની બહેનનું રાજવીર સાથે અફેર હોવાની વાત આખા ગામમાં ફેલાઈ ગઈ હતી. જેના કારણે તેના દોસ્તો તેની મજાક ઉડાવતા હતા.

બહેનના અફેરને કારણે પોતાને શરમજનક સ્થિતિમાં મૂકાવું પડતાં આરોપીએ બદલો લેવાનું નક્કી કર્યું હતું. તેણે પોતાના કેટલાક દોસ્તોની મદદથી રાજવીરના મર્ડરનો પ્લાન બનાવ્યો હતો. ૨૫ જૂને રાજવીરે પોતાની પ્રેમિકાને સોનાની ચેઈન ગિફ્ટ કરી હતી, અને તેનું બોક્સ પણ તેની પાસે જ હતું. પોલીસને આ બોક્સ પણ મળી આવ્યું હતું. પોલીસના જણાવ્યા અનુસાર, ૨૫મીએ રાજવીરને પ્રેમિકાના ઘરમાંથી બહાર નીકળતા આરોપીનો એક મિત્ર તેને જોઈ ગયો હતો. અંતે બીજા દિવસે રાજવીરને એક જગ્યાએ એકલો જોતા જ તેની પ્રેમિકાના ભાઈએ પોતાના દોસ્તની મદદથી તેના પર ફાયરિંગ કર્યું હતું. ગોળી વાગવાને કારણે રાજવીર ત્યાં જ ઢળી પડ્યો હતો અને તેનું પ્રાણપંખેરું ઉડી ગયું હતું. આ મામલે પોલીસે રાજવીરની પ્રેમિકાના ભાઈ અને તેને મદદ કરનારા એક મિત્ર અને સંબંધીની ધરપકડ કરી છે.