Gujarati News

ઈસ્‍લામાબાદ તા. ૩૦ : ઈમરાન ખાન ફરી એકવાર ચૂંટણીના મેદાનમાં ઝંપલાવવાની તૈયારી કરી રહ્યા છે. ઈમરાન ટૂંક સમયમાં પાકિસ્‍તાનમાં ચૂંટણી ભાષણ આપતા જોવા મળશે. હકીકતમાં, પાકિસ્‍તાન તહરીક-એ-ઇન્‍સાફ (PTI)ના વડા ઇમરાન ખાને માર્ચમાં તમામ મતવિસ્‍તારોની ૩૩ નેશનલ એસેમ્‍બલી સીટો પર પેટાચૂંટણી લડવાનો નિર્ણય કર્યો છે.

રવિવારે પીટીઆઈના વરિષ્ઠ નેતા શાહ મહમૂદ કુરેશીએ ઈમરાનની ઉમેદવારીની જાહેરાત કરી હતી. શાહે કહ્યું કે પાર્ટીએ પેટાચૂંટણીમાં ભાગ લેવાનો નિર્ણય કર્યો છે અને ઈમરાન ખાન તમામ સીટો પરથી ચૂંટણી લડશે. અગાઉ, શુક્રવારે, પાકિસ્‍તાનના ચૂંટણી પંચ (ECP) એ જાહેરાત કરી હતી કે નેશનલ એસેમ્‍બલીની ૩૩ બેઠકો માટે પેટાચૂંટણી ૧૬ માર્ચે યોજાશે. એનએ પ્રમુખ રાજા પરવેઝ અશરફે પીટીઆઈ સાંસદોના રાજીનામા સ્‍વીકાર્યા બાદ આ બેઠકો ખાલી પડી હતી.

ધ એક્‍સપ્રેસ ટ્રિબ્‍યુન અનુસાર, પીટીઆઈના નેતા ફવાદ ચૌધરીએ આ મહિનાની શરૂઆતમાં નેશનલ એસેમ્‍બલીની તમામ ખાલી બેઠકો પર પેટાચૂંટણી લડવાના પક્ષના વડાના નિર્ણયની જાહેરાત કરી હતી. ફવાદે ૧૭ જાન્‍યુઆરીએ ટ્‍વિટર પર એક નિવેદનમાં કહ્યું હતું કે તહરીક-એ-ઇન્‍સાફ તમામ સીટો પર ચૂંટણી લડશે અને ઇમરાન ખાન આ ૩૩ સીટો પર તહરીક-એ-ઇન્‍સાફના એકમાત્ર ઉમેદવાર હશે.

શાહ મહેમૂદ કુરૈશીએ આગલા દિવસે કહ્યું હતું કે લોકોએ ૧૭ જુલાઈની પેટાચૂંટણી દરમિયાન પણ પીટીઆઈને સમર્થન આપ્‍યું હતું અને પાર્ટીને આશા છે કે લોકો ૧૬ માર્ચે તેમના મતો દ્વારા ફરી એકવાર ઈમરાન ખાનમાં તેમનો વિશ્વાસ બતાવશે. તેમણે કહ્યું કે ચ્‍ઘ્‍ભ્‍દ્ગચ સીટો ખાલી થયાના ૯૦ દિવસની અંદર ચૂંટણી કરાવવાનો આદેશ આપવામાં આવ્‍યો હતો અને જો તે સમયસર ન યોજાય તો તે બંધારણનું ઉલ્લંઘન ગણાશે.

પાકિસ્‍તાનમાં કોઈ વ્‍યક્‍તિ એક સાથે કેટલીય સીટો પર ચૂંટણી લડી શકે છે અને આ અંગે કોઈ કાયદો નથી. જો કે ચૂંટણી બાદ તેણે માત્ર એક જ સીટ જાળવી રાખવી પડશે અને બાકીની તમામ સીટ છોડી દેવી પડશે. પાકિસ્‍તાનનું ચૂંટણી પંચ ૬૦ દિવસની અંદર તે બેઠકો પર ફરીથી ચૂંટણી કરાવે છે.