Gujarati News

નવી દિલ્‍હી તા. ૩૦ : વર્ષ ૨૦૨૨ માં, વિશ્વના તમામ અબજોપતિઓમાં સૌથી વધુ કમાણી કરનાર વ્‍યક્‍તિ... ટોપ-૩ અમીરોમાં સામેલ ભારતીય ઉદ્યોગપતિ ગૌતમ અદાણી માટે નવા વર્ષની શરૂઆત ખરાબ રહી. પહેલા જ મહિનામાં અમેરિકાથી એક રિસર્ચ રિપોર્ટ આવ્‍યો, જેણે ૬૦ વર્ષના ગૌતમ અદાણીના સામ્રાજય પર એટલી ખરાબ અસર કરી કે તેમની કુલ સંપત્તિનો પાંચમો ભાગ માત્ર બે દિવસમાં જ બરબાદ થઈ ગયો. આ એટલી રકમ છે કે આર્થિક સંકટનો ભોગ બનેલા પાકિસ્‍તાનના ગરીબ લોકો મહિનાઓ સુધી બેસીને ખાઈ શકે છે.

અમેરિકન રિસર્ચ ફર્મ હિંડનબર્ગનો રિપોર્ટ ૨૪ જાન્‍યુઆરી ૨૦૨૩ના રોજ પ્રકાશિત થયો હતો, જેમાં અદાણી ગ્રુપને લઈને ૮૮ પ્રશ્નો ઉઠાવવામાં આવ્‍યા હતા અને લોન અંગેના દાવા પણ કરવામાં આવ્‍યા હતા. ગ્રૂપ કંપનીઓના શેર પર તેમનો પ્રભાવ એવો હતો કે તેઓ થોડી જ વારમાં તૂટી પડ્‍યા. રોકાણકારોના સેન્‍ટિમેન્‍ટ પર અહેવાલની અસરને કારણે અદાણીની વિવિધ કંપનીઓના બોન્‍ડ અને શેર ઘટ્‍યા હતા. શુક્રવારે અદાણી ગ્રીન એનર્જી અને અદાણી ટોટલ ગેસના શેરમાં ૨૦ ટકા સુધીનો ઘટાડો થયો હતો.

બ્‍લૂમબર્ગના અહેવાલ મુજબ, અદાણી ગ્રૂપ સાથે સંકળાયેલી તમામ કંપનીઓના અદાણી શેરને ખરાબ રીતે તોડવાની પ્રક્રિયા છેલ્લા બે ટ્રેડિંગ દિવસોથી ચાલુ છે. આ કારણે ભારતીય અબજોપતિની સંપત્તિમાં અત્‍યાર સુધીનો સૌથી મોટો ઘટાડો જોવા મળ્‍યો છે. જો તમે બિલિયોનેર્સ ઈન્‍ડેક્‍સના આંકડાઓ પર નજર નાખો તો માત્ર છ કલાકના ટ્રેડિંગ દરમિયાન અદાણી ગ્રુપની કંપનીઓના કુલ માર્કેટ કેપમાં $૫૦ બિલિયન અથવા લગભગ રૂ. ૪ લાખ કરોડનો ઘટાડો થયો છે. આની સીધી અસર ગૌતમ અદાણીની નેટવર્થ પર પડી અને એક જ ઝાટકે તેઓ વિશ્વના ટોપ-૧૦ ધનિકોની યાદીમાં ચોથા સ્‍થાનેથી સાતમા સ્‍થાને આવી ગયા.

બ્‍લૂમબર્ગે લગભગ એક દાયકા પહેલા વિશ્વના સૌથી ધનિક લોકોની સંપત્તિ પર ડેટા રાખવાનું શરૂ કર્યું હતું અને ત્‍યારથી શુક્રવાર ૨૭ જાન્‍યુઆરી ૨૦૨૩ સુધીના સમયગાળામાં એશિયાના કોઈપણ અમીરોની સંપત્તિમાં આ સૌથી મોટો ઘટાડો છે. ગૌતમ અદાણીએ એક દિવસમાં $૨૦.૮ બિલિયનની રકમ ગુમાવી, જે તેમની કુલ નેટવર્થનો લગભગ પાંચમો ભાગ છે. નેટવર્થમાં થયેલા આ જંગી ઘટાડાને કારણે અદાણી ગ્રુપના ચેરમેન એવા અમીરોની યાદીમાં આવી ગયા જેમણે માત્ર એક જ દિવસમાં સૌથી વધુ સંપત્તિ ગુમાવી છે

છેલ્લા બે દિવસમાં ગૌતમ અદાણીની નેટવર્થમાં રૂ. ૨.૧૧ લાખ કરોડથી વધુનો ઘટાડો નોંધાયો છે. નિષ્‍ણાતોનો અંદાજ છે કે આ રકમથી આર્થિક સંકટનો સામનો કરી રહેલા પાકિસ્‍તાનના ગરીબ અને ભૂખ્‍યા લોકો લગભગ ૮ મહિના સુધી બેસીને ભોજન કરી શકશે. આર્થિક સંકટમાંથી પસાર થઈ રહેલા પાકિસ્‍તાનની ૮ મહિનાની આયાત માટે આ રકમ પૂરતી છે. બ્‍લૂમબર્ગ બિલિયોનેર્સ ઈન્‍ડેક્‍સ અનુસાર, ગૌતમ અદાણીની કુલ સંપત્તિ ઘટીને ૯૨.૭ બિલિયન થઈ ગઈ અને આટલી સંપત્તિ સાથે તેઓ વિશ્વના સૌથી ધનિકોમાં સાતમા ક્રમે આવી ગયા.(૨૧.૮)

એક દિવસમાં અબજોપતિનું

નામ ઉડી ગયું

એલોન મસ્‍ક $૩૫ બિલિયન

માર્ક ઝકરબર્ગ $૩૧ બિલિયન

એલોન મસ્‍ક $૨૫.૮ બિલિયન

ગૌતમ અદાણી $૨૦.૮ બિલિયન

જેફ બેઝોસ $૨૦.૫ બિલિયન