Gujarati News

નવી દિલ્‍હીઃ વડા પ્રધાન નરેન્દ્ર મોદીએ ઓડિશાના આરોગ્ય પ્રધાન નબા કિશોર દાસના ગોળી વાગવાથી થયેલા નિધન પર શોક વ્યક્ત કર્યો છે.

એક ટ્વિટમાં પીએમ મોદીએ કહ્યું કે ઓડિશા સરકારમાં મંત્રી નબા દાસના દુર્ભાગ્યપૂર્ણ નિધનથી દુઃખી છું. આ દુઃખદ ઘડીમાં તેમના પરિવાર પ્રત્યે સંવેદના. ઓમ શાંતિ.

મુખ્યમંત્રીએ કહ્યું કે આ ઘટનાથી હું આઘાત અને પરેશાન છું. નબા કિશોર દાસ અમારી સરકાર અને પાર્ટીની સંપત્તિ હતા. CMએ એક નિવેદનમાં કહ્યું કે મંત્રી નબા દાસના અત્યંત દુર્ભાગ્યપૂર્ણ અવસાનથી હું આઘાત અને દુઃખી છું. CMએ કહ્યું કે ડોક્ટરોએ તેનો જીવ બચાવવા માટે શક્ય તમામ પ્રયાસ કર્યા, પરંતુ કમનસીબે તે બચી શક્યા નહીં. ઓડિશાના CM પટનાયક મંત્રી નબા દાસના પરિવારજનોની મુલાકાત પણ કરી હતી અને સાંત્વના પાઠવી હતી. આ પહેલા તેઓ હોસ્પિટલ પણ પહોંચ્યા હતા અને મંત્રીના ખબરઅંતર પૂછ્યા હતા.

પૂર્વ ક્રિકેટર અને આમ આદમી પાર્ટીના રાજ્યસભા સાંસદ હરભજન સિંહે ટ્વીટ કરીને નબા દાસના નિધન પર શોક વ્યક્ત કર્યો છે. તેમણે કહ્યું કે ઓડિશા સરકારના સ્વાસ્થ્ય મંત્રી નબા દાસના ગોળીબારમાં મૃત્યુ વિશે જાણીને ઊંડો આઘાત લાગ્યો. તેમના પરિવાર, મિત્રો અને સમર્થકો પ્રત્યે મારી સંવેદના છે.

દિલ્હીના મુખ્યમંત્રી અરવિંદ કેજરીવાલે પણ નબા દાસના નિધન પર શોક વ્યક્ત કર્યો હતો. તેમણે કહ્યું કે ઓડિશા સરકારમાં મંત્રી, નબા કિશોર દાસનું નિધન અત્યંત દુઃખદ અને દુર્ભાગ્યપૂર્ણ છે. આ મુશ્કેલ સમયમાં તેમના પરિવાર પ્રત્યે સંવેદના. ભગવાન તેમના પરિવારના સભ્યોને આ દુઃખ સહન કરવાની શક્તિ આપે.